Loading ...
Britania e Madhe do të akordojë 100 milionë paund, rreth 116 milionë euro, për të forcuar mbrojtjen ajrore të Ukrainës gjatë dimrit. Paketa e re e ndihmës do të përfshijë raketa Patriot, interceptorë të mbrojtjes ajrore, municione artilerie të kalibrit të madh dhe dronë.
Ministria britanike e Mbrojtjes bëri të ditur se pajisjet do të sigurohen përmes një programi të NATO-s që mbështet Ukrainën dhe synon të garantojë një furnizim të qëndrueshëm me pajisje ushtarake. Pajisjet pritet të dorëzohen para dimrit dhe do të përdoren për të mbrojtur infrastrukturën kritike, civilët dhe forcat ukrainase nga sulmet ruse.
Ukraina mbështetet veçanërisht te sistemet amerikane Patriot për mbrojtjen e hapësirës ajrore nga sulmet me raketa balistike ruse. Megjithatë, Kievi ka raportuar mungesë të interceptorëve Patriot, ndërsa furnizimet janë ndikuar edhe nga lufta mes Shteteve të Bashkuara, Izraelit dhe Iranit, e cila ka rritur kërkesën për këto sisteme.
Britania ka qenë një nga mbështetësit kryesorë të Ukrainës që prej pushtimit në shkallë të plotë nga Rusia në shkurt të vitit 2022. Sipas të dhënave të publikuara në Westminster, Londra ka angazhuar rreth 25 miliardë paund për Ukrainën, të ndara mes mbështetjes ushtarake dhe asaj jo-ushtarake.
Londra ka rënë gjithashtu dakord t’i japë Ukrainës informacion mbi komponentët e raketës me rreze të gjatë SCALP, versioni i prodhuar në Francë i raketës britanike Storm Shadow. Ky informacion do t’i mundësojë Ukrainës të krijojë linja lokale për montimin e raketave.
Ministri i ri britanik i Mbrojtjes, Wes Streeting, do të bashkëdrejtojë takimin e tij të parë të Grupit të Kontaktit për Mbrojtjen e Ukrainës, i cili përfshin rreth 50 vende që ofrojnë pajisje dhe mbështetje ushtarake për Kievin.
Streeting tha se gjatë vizitës së tij të parë në Kiev e kishte kuptuar qartë rëndësinë e mbështetjes për Ukrainën gjatë dimrit. Ai akuzoi presidentin rus Vladimir Putin se po përgatitet “ta përdorë dimrin si armë”, duke vazhduar sulmet ndaj objektivave civile dhe infrastrukturës energjetike.
“Si kryeministri, ashtu edhe unë e kuptuam qartë gjatë vizitave tona të para në Kiev rëndësinë e mbështetjes për Ukrainën gjatë këtij dimri, ndërsa Putin përgatitet ta përdorë dimrin si armë duke vazhduar sulmet barbare ndaj objektivave civile dhe energjetike”, tha Streeting.
Me paketën e re të ndihmës, Britania synon të ndihmojë Ukrainën të përballojë sulmet ruse gjatë muajve të dimrit dhe të mbrojë infrastrukturën e saj jetike. Londra mbetet një nga aleatët kryesorë të Kievit dhe ka deklaruar se do të vazhdojë mbështetjen ushtarake dhe financiare për Ukrainën.
