Loading ...
Shtetet e Bashkuara dhe Kanadaja nuk arritën një marrëveshje tregtare pas dështimit të negociatave të fundit mes dy vendeve, duke përshkallëzuar tensionet ekonomike mes dy aleatëve.
Negociatat përfunduan të premten në mbrëmje, ndërsa Uashingtoni konfirmoi se do të vijojë me vendosjen e tarifave shtesë prej 50% për disa produkte kanadeze të importuara në tregun amerikan. Masat prekin rreth 5.5% të eksporteve kanadeze drejt SHBA-së, me një vlerë të përllogaritur prej rreth 20 miliardë dollarësh.
Ministri kanadez i Tregtisë, Dominique LeBlanc, kaloi ditët e fundit në Uashington në përpjekje për të gjetur një kompromis dhe për të zbutur krizën tregtare mes dy vendeve.
Megjithatë, përfaqësuesi i tregtisë i Shtëpisë së Bardhë, Jamieson Greer, deklaroi se kërkesat e reja të Kanadasë dhe ndryshimet në angazhimet e saj kishin prishur ekuilibrin e arritur gjatë negociatave.
Nga ana tjetër, kryeministri kanadez Mark Carney njoftoi pezullimin e negociatave dhe kthimin e ekipit kanadez në Ottawa.
Carney tha se negociatorët kanadezë kishin punuar deri në minutën e fundit për të mbrojtur interesat e vendit, por i cilësoi ndryshimet e fundit në kushtet e propozuara nga SHBA-ja si të padrejta dhe ekonomikisht të pajustifikueshme.
Kryeministri kanadez paralajmëroi gjithashtu se Ottawa do të kundërpërgjigjet me tarifa ekuivalente, dollar për dollar, për të mbrojtur punëtorët dhe bizneset kanadeze.
Dështimi i negociatave shënon një tjetër përshkallëzim në marrëdhëniet tregtare SHBA-Kanada, të cilat janë tensionuar ndjeshëm që prej rikthimit të Donald Trump në presidencën amerikane.
