Loading ...“Pas disa orëve të vështira mes flakëve dhe tymit, situata në Krujë është normalizuar. Zjarri ka lënë pas dëme të konsiderueshme materiale, ndërsa fatmirësisht nuk ka persona të lënduar.
Tashmë, për banorët e prekur nis përballja me pasojat dhe rikthimi gradual në normalitet.”
Rreziku ka kaluar shumë pranë banesave. Shtëpitë kanë shpëtuar pa dëme, por gjithçka përreth tyre është përfshirë nga flakët. Pemë, bimësi dhe sende në oborre janë shkrumbuar
Mes objekteve të prekura nga flakët është edhe një magazinë e ujësjellësit. Objekti nuk ka mundur t’i shpëtojë zjarrit dhe është djegur, ndërsa flakët kanë rrezikuar edhe banesat e tjera pranë tij
Momente paniku kanë përjetuar banorët e zonës, të cilët tregojnë se gjatë natës janë detyruar të largohen nga banesat e tyre, për t’u rikthyer vetëm në orët e mëngjesit
“Natën kemi dalë nga shtëpitë dhe jemi rikthyer në mëngjes. Kishim frikë nga çdo moment, sepse flaka vazhdonte të afrohej.
Flakët kanë përfshirë edhe kabllot e linjës elektrike, duke shkaktuar ndërprerje të energjisë në zone
Në fshatin Barabit, situata vijon të mbahet nën monitorim. Edhe pse rreziku kryesor është kaluar, temperaturat e larta dhe terreni i thatë mbeten faktorë që kërkojnë vëmendje dhe monitorim të vazhdueshëm, për të shmangur çdo mundësi riaktivizimi të vatrave të zjarrit
Për zjarrin në Krujë është arrestuar Qemal Berhami. Sipas policisë, ai kishte ndezur barishte pranë shtëpisë së tij, por flakët dolën jashtë kontrollit dhe u përhapën me shpejtësi, duke vënë në rrezik një pjesë të Krujës./abcnews.al
