Ulja e Carlo Ancelotti në pankinë ka rritur entuziazmin në ambientin e Everton. Të dielën luhet derbi i qytetit kundër Liverpool, kësaj radhe në FA Cup. Lufta për t’u kualifikuar në raundin e 1/8 do të jetë e madhe dhe të dy ekipet do të luftojnë fort.
Italiani e cilëson si një sfidë fantastike dhe nuk pranon të flasë konkretisht për merkaton në konferencë për shtyp. Emra si James Rodriguez (Real Madrid) Adrien Rabiot (Juventus) dhe Steven Nzonzi (Roma) përfliten si përforcimet e janarit, por në fillim duhen vlerësuar lojtarët aktualë të ekipit.
“Nuk kam menduar ende për merkaton, e kam mendjen te ndeshja kundër Liverpool. Në fillim do vlerësoj lojtarët që kam në dispozicion. Nuk kemi shumë kohë si pasojë e ndeshjeve të shumta që po luajmë, por kam krijuar një ide dhe nga dita në ditë po i njoh më mirë lojtarët.
Më pas, nëse ekziston mundësia që klubi të përforcojë skuadrën… E di që ju gazetarët doni që të flas rreth merkatos, por sinqerisht preferoj të flas për derbin kundër Liverpool. Do të jetë një sfidë fantastike, një mundësi shumë e madhe për ne. Duhet të jemi të përqendruar dhe të luajmë ndeshjen perfekte, vetëm kështu mund t’ia dalim“, thekson trajneri i Everton. /abcnews.al
