Loading ...
Tirana bëhet sërish kryeqyteti i kinemasë ndërkombëtare. Nga 1 deri më 5 qershor, edicioni i 13-të i Festivalit Ndërkombëtar të Filmit DEA Open Air rikthehet me moton domethënëse “Qiell i Hapur, Mendje të Hapura”, duke sjellë në ekran 40 filma nga 25 vende të botës.
Nën drejtimin e Edmond Topit, festivali vjen këtë vit me një program të pasur artistik dhe kulturor, ku publiku do të ketë mundësinë të ndjekë prodhime filmike nga kontinente dhe kultura të ndryshme, duke e kthyer Tiranën në një pikëtakim të rëndësishëm të artit kinematografik.
Filmat në konkurrim janë ndarë në tre seksione kryesore: 7 filma me metrazh të gjatë, 15 filma të shkurtër dhe 18 filma studentorë, duke krijuar një panoramë të gjerë të krijimtarisë bashkëkohore në kinema. Ceremonia e hapjes dhe projeksionet kryesore do të zhvillohen në Amfiteatrin e Universitetit të Arteve, ndërsa një pjesë e aktiviteteve dhe shfaqjeve do të zhvendosen në Teatrin Eksperimental “Kujtim Spahivogli”, duke e shtrirë festivalin në disa nga hapësirat më të rëndësishme artistike të kryeqytetit.
Por DEA Open Air nuk është vetëm festival filmash. Përveç projeksioneve, do të organizohen takime profesionale, diskutime, masterclass dhe aktivitete që synojnë të forcojnë dialogun kulturor dhe shkëmbimin e përvojave mes artistëve shqiptarë dhe atyre ndërkombëtarë. Një nga risitë dhe pikat më të rëndësishme të këtij edicioni është Akademia DEA, një platformë e dedikuar për artistët e rinj. Përmes një bashkëpunimi mes studentëve të Universitetit të Prishtinës dhe Universitetit Europian të Tiranës, të rinjtë do të realizojnë projektin audioviziv “Tirana – Dashuria Ime”.
