Loading ...Eksperti i ekonomisë Adrian Civici ka paralajmëruar për një periudhë pasigurie në ekonominë shqiptare, teksa inflacioni shfaq shenja të lehta rritjeje në muajt e fundit. I ftuar në emisionin “Money Report” në ABC News, Civici theksoi se tensionet në Lindjen e Mesme dhe luhatjet e çmimit të naftës kanë ndikuar drejtpërdrejt sektorin e transportit dhe, për rrjedhojë, edhe çmimet në vend.
Sipas tij, edhe Banka e Shqipërisë ka ngritur shqetësimin për një situatë të paqartë ekonomike, duke sinjalizuar mundësinë e rishikimit të politikës monetare. Megjithëse inflacioni aktual prej 2.6% konsiderohet ende i ulët, Civici nuk përjashton një tendencë rritëse në vijim, çka mund të kërkojë ndërhyrje për ta mbajtur nën kontroll.
Ai nënvizoi se pasiguria për furnizimin me naftë mbetet faktori kryesor që ndikon në rritjen e çmimeve, ndërsa zhvillimet ndërkombëtare dhe deklaratat e figurave si Donald Trump kanë reflektuar menjëherë në tregjet globale. Në këtë kontekst, Civici theksoi nevojën që vendet, përfshirë Shqipërinë, të reduktojnë varësinë nga nafta e Lindjes së Mesme dhe të ndërmarrin ndryshime strategjike për të përballuar krizat e ardhshme ekonomike.
“Ne kemi kishim hyrë në një fazë të lehtë të rritjes së inflacionit në 2-3 muajt e fundit. Por, për shkak të tensioneve në Lindjen e Mesme dhe të çmimit të naftës, sektori i transportit dha pasojat e tij në ekonomia. Një ndikim të konsiderueshëm ka edhe rritja e çmimeve. Banka e Shqipërisë në qëndrimin e saj të fundit e ngriti shqetësimin për një situatë paqartësie që e pret ekonominë shqiptare dhe njëkohësisht dha një sinjal paraprak që banka do e shqyrtojë qëndrimin e saj në politikën monetare. Deri tani inflacioni 2.6% është një inflacion ende i ulët.
Ekziston mundësia që inflacioni të ketë një tendencë rritëse dhe të merren masat për kontrollin e inflacionit. Në fakt goditjen kryesore për rritjen e çmimeve e dha pasiguria për furnizimin me naftë. Edhe pse çmimi i naftës për fuçi është ulur shumë lerë është ndikuar nga deklaratat e Donald Trump. Bursat reflektuan menjëherë për armëpushimin 2 javor. Nga çdo krizë dalin analizat e duhura për ndryshimet strategjike që duhen bërë, jo vetëm për naftën, por edhe për plehrat kimike. Vendet duhet të shkëputen nga varësia e naftës në Lindjen e Mesme. Kjo varësia e bën Shqipërinë që të ndikohet nga çdo gjë që do të ndodhë”, tha Civici.
