Loading ...
Një ngjarje tragjike ka ndodhur në Itali, ku një familje shqiptare është shuar e gjitha. Ngjarja e rëndë ndodhi në Rughi, ku katër anëtarët e familjes me origjinë shqiptare, dyshohet se u helmuan nga monoksidi i karbonit.
Sipas mediave italiane, tragjedia ndodhi mbrëmjen e së mërkurës.
Viktimat janë dy prindërit, përkatësisht Arti dhe Jonida Kola (48 dhe 43 vjeç), si dhe dy fëmijët Hajdar dhe Xhesika Kola, 22 dhe 15 vjeç.
Edhe pse shërbimet e emergjencës ndërhynë menjëherë, katër familjarët u konstatuan të vdekur.
Një helikopter mjekësor u vu në dispozicion fillimisht, por u tërhoq sapo familjarët u shpallën të vdekur.
Autoritetet italiane po hetojnë për të zbardhur shkaqet e plota të ngjarjes tragjike.
Ndërkohë një person i pestë është dërguar në spital për ndihmë të mëtejshme mjekësore, jashtë rrezikut për jetën.
Ishte vëllai i kryefamiljarit ai qe fillimisht dha alarmin pasi nuk po arrinte të kontaktonte me ta, duke i detyruar të shkonte me pas në banesë rreth orës 20:00 të mbrëmjes, por koha e saktë e tragjedisë nuk është përcaktuar.
Tre oficerët e karabinierëve që hynë fillimisht në shtëpi patën gjithashtu probleme të lehta nga monoksidi i karbonit.
