Loading ...
Në histori ka hyrë nga porta kryesore. Xhon Robertson është një nga emblemat e futbollit skocez, britanik dhe atij botëror, dhe ky sport sot po mban zi për largimin e tij.
Në moshën 72-vjeçare mbylli sytë pasi vuajti nga një sëmundje, ndërsa mbahet mend si një prej yjeve të Notingem Forestit të viteve 70-të e 80-të të shekullit të kaluar, që arritën diçka krejt të veçantë.
Fituan vetëm një kampionat anglez, por plot dy Champions.
Në 1978, skuadra e trajnerit Brajan Klaf triumfoi në atë që sot njihet si Premier Liga, pasi u ngjit në elitë vetëm në 1977.
Më pas, në 1979 dhe 1980, fitoi Kupën e atëhershme të Kampionëve, Championsin e tanishëm dhe Robertson ishte vendimtar.
Lojtari ofensiv I krahut të majtë shërbeu asistin në suksesin 1-0 ndaj Malmos në 1979 në Mynih, dhe shënoi golin e vetëm në fitoren ndaj Hamburgut në1980 në “Santiago Bernabeu” të Madridit.
Trajneri I tij, Klaf, I vuri epitetin “Pikaso I futbollit” për stilin e tij artistik të lojës.
Për 14 vjet luajti për Notingem Forestin, plot 500 ndeshje, duke fituar një titull në Angli, dy Champions, dy Kupa të Ligës në Angli, një Superkupë të Europës dhe dy Superkupa të Anglisë.
Për Skocinë luajti 28 ndeshje dhe shënoi 8 gola, e nuk harrohet ai në 1981 në “Uembli” të Londrës kundër rivalit më të urryer, Anglisë, në fitoren 1-0 në Kampionatin e vendeve britanike.
