Loading ...
Barcelona, Tetor 2025 – Një nga figurat më të rëndësishme të industrisë së modës spanjolle, Isak Andic, themeluesi i zinxhirit të njohur të dyqaneve “Mango”, u gjet i vdekur dhjetorin e kaluar pas një rënie nga një shkëmb mbi 100 metra i lartë në zonën malore të Montserrat, pranë Barcelonës. Fillimisht, vdekja u raportua si një aksident tragjik gjatë një shëtitjeje me djalin e tij, por tashmë, rreth dhjetë muaj më vonë, autoritetet spanjolle po e hetojnë rastin si vrasje të mundshme.
Sipas burimeve të mediave prestigjioze spanjolle El País dhe La Vanguardia, Jonathan Andic, djali i vetëm dhe bashkëpunëtor i ngushtë i Andic, është shpallur person zyrtarisht nën hetim nga policia katalanase, Mossos d’Esquadra. Ai ishte personi i vetëm që shoqëronte Isakun atë ditë fatale – më 14 dhjetor 2024 – në një nga shtigjet që të dy e njihnin mirë në zonën Collbató.
Nga aksident në hetim penal
Pavarësisht se në fillim nuk kishte asnjë dëshmi që të nënkuptonte veprim kriminal, hetuesit nisën të dyshonin pas kundërthënieve në dëshminë e Jonathan-it dhe mospërputhjeve në të dhënat gjeolokuese të telefonit të Isakut. Informacionet e zbuluara nga pajisjet elektronike duket se tregojnë një version tjetër të ngjarjeve nga ai që ka dhënë i biri.
Policia ka mbledhur gjithashtu dëshmi nga partnerja e Isakut, Estefania Knut, një lojtare e njohur golfi, dhe nga persona të tjerë pranë familjes. Megjithatë, deri tani nuk ka prova të qarta fizike që vërtetojnë një krim, çka e bën hetimin të ndërlikuar dhe delikat.
Një figurë e fshehtë e modës globale
Isak Andic, i lindur në Stamboll në vitin 1953, në një familje hebraike sefardike, emigroi në Spanjë në vitet ’60. Ai nisi karrierën si shitës këmishash në rrugët e Barcelonës dhe e ndërtoi Mango-n nga e para në vitin 1984, bashkë me vëllanë e tij Nachman. Marka u rrit me shpejtësi, duke u kthyer në një perandori globale me mbi 2,500 dyqane në 110 vende, dhe duke e renditur Andic-un mes biznesmenëve më të pasur të Spanjës – me një pasuri të vlerësuar nga Forbes në 4.5 miliardë dollarë.
I njohur për privatësinë ekstreme dhe përkushtimin ndaj punës, Andic rrallë jepte intervista dhe rrallë shfaqej në media. Ai njihej si një njeri i përulur dhe i fiksuar pas detajeve, që shpesh vizitonte dyqanet në mënyrë të fshehtë për të kontrolluar vetë ambientet.
Një trashëgimi që tani ndodhet nën hije
Pas vdekjes së tij, kompania Mango ka hyrë në një fazë ristrukturimi. Drejtimin e bordit e ka marrë Tony Ruith, drejtori ekzekutiv, ndërsa Jonathan Andic u emërua nënkryetar, me motrat e tij Judith dhe Sarah që morën gjithashtu role në kompaninë mëmë, MNG.
Familja Andic ka qëndruar në heshtje publike, duke publikuar vetëm një deklaratë të shkurtër ku theksonin mbështetjen e plotë për Jonathan-in dhe besimin në drejtësinë spanjolle.
Hetimet vijojnë në konfidencialitet të plotë nga gjykata e Martorellit, ndërsa policia vazhdon të analizojë të dhënat, dëshmitë dhe rrjedhën e ngjarjeve. / abcnews.al /
