Loading ...
Keir Starmer dhe Donald Trump do të takohen këtë të enjte në rezidencën rurale të Kryeministrit Britanik.
Ky është një takim në kuadër të vizitës së Presidentit të SHBA-së në Mbretërinë e Bashkuar që ka të bëjë me politikën dhe diplomacinë dhe jo vetëm midis dy miqve dhe aleatëve.
Pavarësisht këtij takimi të rëndësishëm, sondazhet e fundit paraqesin një pamje mjaft të pafavorshme për dy udhëheqësit në Shtetet e Bashkuara dhe Britani.
Donald Trump, megjithëse ruan një prani të fortë në skenën politike, ka një vlerësim miratimi prej rreth 39%, me 57% të amerikanëve që shprehin një mendim negativ gjatë mandatit të tij të dytë.
Edhe më negative janë të dhënat për Keir Starmer në Mbretërinë e Bashkuar, pasi anketa e fundit e YouGov në gusht 2025 regjistroi vetëm 24% mendime pozitive ndaj tij, ndërsa pothuajse shtatë në dhjetë britanikë deklarohen negativë.
Ndërsa në takimin e zhvilluar një ditë më parë; u shpall një pako investimesh prej 150 miliardë paundësh nga Shtetet e Bashkuara, në kuadër të vizitës shtetërore të presidentit Donald Trump në Mbretërinë e Bashkuar.
Kjo është marrëveshja më e madhe e këtij lloji, sipas qeverisë britanike, e cila e cilësoi si një zhvillim historik në marrëdhëniet tregtare mes dy vendeve, raporton BBC.
Sipas autoriteteve britanike, marrëveshja pritet të sjellë 7,600 vende të reja pune “me cilësi të lartë” në sektorë të ndryshëm të ekonomisë.
Kryeministri Keir Starmer deklaroi se kjo është një dëshmi e përmbushjes së premtimit të tij për “vende pune, rritje dhe mundësi”. Megjithatë, shifra mbetet ende modeste në krahasim me 160 mijë vendet e humbura të punës gjatë vitit të kaluar.
Kjo marrëveshje vjen menjëherë pas një tjetër lajmi të madh nga sektori i teknologjisë, ku gjigandët si Microsoft dhe Google njoftuan investime të reja në miliarda paund për ekonominë britanike, gjithashtu në kuadër të vizitës së Trump.
