Loading ...
Presidenti Donald Trump ka paraqitur një plan të ri buxhetor që parashikon një shkurtim të madh prej 163 miliardë dollarësh në shpenzimet federale për vitin fiskal 2026.
Sipas propozimit të administratës, fondet për sektorë të brendshëm si arsimi, strehimi, shëndetësia dhe ndihma e huaj do të ulen ndjeshëm, ndërsa shpenzimet për mbrojtjen kombëtare dhe sigurinë kufitare do të rriten me ritme të shpejta.
Në këtë draft buxhetor: Shpenzimet për Departamentin e Arsimit do të bien me 13.7 miliardë dollarë, si pjesë e një plani afatgjatë për t’ia kaluar kompetencat shteteve. Programet për strehimin social do të pësojnë shkurtime drastike, duke ulur ndjeshëm ndihmën për familjet me të ardhura të ulëta. Ndihma e jashtme do të përgjysmohet, me më shumë se 8 miliardë dollarë të prerë nga programet e zhvillimit dhe ndihmës ekonomike në vende të huaja.
Financimi për mbrojtjen do të kapë shifrën rekord prej mbi 1 trilion dollarësh, me një rritje prej 13%, ndërsa siguria e brendshme do të marrë një shtesë prej gati 65% krahasuar me vitin aktual.
Në një deklaratë për shtyp, administrata e Trumpit e justifikoi planin si një “rikthim te prioritetet kombëtare” dhe theksoi nevojën për një forcim të kapaciteteve mbrojtëse dhe kufitare.
Reagimet politike kanë qenë të menjëhershme: Demokratët e kanë quajtur këtë propozim një “sulm të drejtpërdrejtë ndaj shtresës së mesme dhe të varfër”, duke paralajmëruar pasoja të rënda sociale.
Brenda vetë Partisë Republikane ka pasur zëra kritikë, përfshirë senatoren Susan Collins, e cila ka ngritur shqetësime për efektet që mund të ketë në komunitetet rurale dhe në sistemin arsimor publik.
Megjithëse propozimi nuk ka fuqi detyruese, ai shërben si bazë për negociatat në Kongres, ku pritet një betejë e fortë politike mes dy kampeve./abcnews.al
