Janë mbyllur sfidat e orës 20:30 në Premier League, sfida ku golat dhe spektakli nuk kanë munguar. Ndeshja më e rëndësishme ishte padiskutim ajo mes Manchester United dhe Tottenham Hotspur, rikthim i Jose Mourinhos në “Old Trafford”.
Ky rikthim, ishte i hidhur për strategun portugez, pasi Tottenhami i tij u mposht 2-1. Rashford shënoi dy gola për United, duke i dhënë tri pikë të vyera “Djajve të Kuq”. Chelsea ka mposhtur me rezultatin 2-1 ekipin e Aston Villa.
Edhe pse u mposhtën, ekipi që u ngjit këtë sezon në Premier League, bëri një ndeshje shumë të mirë. Abraham dhe Mount i dhanë fitoren Chelseat. Wolverhampton ka mposhtur pastër 2-0 ekipin e West Ham. Golin e dytë dhe të sigurisë për “Ujqërit” e shënoi Patrick Cutrone.
Leicester vazhdon serinë e fitoreve dhe nuk ndalet as ndaj Watford. Jamie Vardy dhe James Maddison i dhanë fitoren 2-0 “Dhelprave”. Southampton ka marrë një fitore mbijetese përballë rivalëve direkt, Norwich. “Shenjtorët” fituan me rezultatin 2-1./abcnews.al
