Dhuna e tifozëve në një ndeshje futbolli në Gjermani la të paktën 79 të plagosur. Nga 79 të plagosurit, 64 ishin tifozë, 10 ishin oficerë policie dhe 5 ishin organizatorë të ndeshjes.
Tifozët e FC Carl Zeiss Jena dhe BSG Chemie Leipzig u përplasën pas ndeshjes së katërt të divizionit, të cilën Jena e fitoi 5-0.
Në një deklaratë nga Policia e Thuringisë, thuhet se disa tifozë të Leipzig, të cilët ishin mysafirë, hodhën lëndë piroteknike drejt tifozëve vendas pas ndeshjes, gjë që nxiti të dy grupet e tifozëve të “hapnin me forcë” dy porta që i ndanin.
Kjo çoi në një “përplasje të shkurtër dhe të pakontrolluar”, sipas policisë.
“Situata mund të ndalohej vetëm nga forcat policore, të cilat ndërhyrën duke përdorur gaz irritues dhe shkopinj,” shtoi deklarata.
Policia njoftoi se u ngritën 40 akuza për krime dhe kundravajtje, ndërkohë që u raportuan edhe “dëme të mëdha në pronë”.
Në një deklaratë, Leipzig e quajti veprimin e tifozëve të tij që hodhën dhe qëlluan piroteknikë drejt tifozëve të Jena-s si “të turpshëm”, por shtoi se ishte “keqbërja e një pakice.”
Jena e quajti këtë një “fund të pakëndshëm” për ndeshjen, duke shtuar: “FC Carl Zeiss Jena u dëshiron të gjithë të lënduarve një rikuperim të shpejtë. Klubi do të krijojë një pasqyrë të plotë të asaj që ndodhi në ditët në vijim, për t’u mundësuar një deklaratë të mirëfilltë mbi incidentin.” /abcnews.al
