Shefja e Fondit Monetar Ndërkombëtar (FMN), Kristalina Georgieva, ka paraqitur një parashikim të zymtë për ekonominë globale përpara takimit vjetor të organizatës javën e ardhshme.
“Ka nje rritje të ulët të ekonomisë e shoqëruar me borxh të lartë”, tha sot në Uashington shefja e FMN-së.
Ajo nuk parashikon një përmirësim edhe pse “vala e madhe” e inflacionit po bie dhe ekonomia botërore nuk ka rënë në recesion.
“Edhe pse shkalla e inflacionit po bie, çmimet mbeten të larta”, tha Georgieva.
Në të njëjtën kohë, ajo theksoi shqetësimet për përshkallëzimin e konfliktit në Lindjen e Mesme dhe potencialin e tij për të destabilizuar ekonomitë e rajonit dhe tregjet globale të naftës dhe gazit.
Në korrik, FMN-ja parashikoi se ekonomia globale do të rritej me 3,2% këtë vit, me një parashikim prej 3,3% për vitin 2025.
FMN-ja dhe Banka Botërore do të nisin takimin e tyre vjetor të hënën, ku do të marrin pjesë ministrat e Financave, përfaqësues nga sektorët financiarë dhe të zhvillimit dhe bankierë qendrorë.
Të martën, FMN-ja do të publikojë perspektivën e re ekonomike për ekonominë globale.
