Pas një ecurie të gjatë që filloi në vitin 2016 në NASL me Miami FC dhe vazhdoi në Serie B me Perugia, Frosinone dhe Reggiana, duket se ka ardhur koha që ish-mbrojtësi i Lazio, Milan (kohë kur në krye të klubit ishin Berlusconi e Galliani) dhe Kombëtares italiane, Alessandro Nesta të bëjë “hapin e madh”, drejt elitës së futbollit italian, duke marrë në duar “frerët” e skuadrës së Monza.
Vetë, Drejtori i Përgjithshëm i klubit, Adriano Galliani e pranoi këtë gjatë prezantimit të eventit “Vino del Condor”, të ardhurat e të cilit do të shkojnë për një shoqatë të dedikuar për trajtimin e Alzheimerit, teksa gjatë fjalës së tij shpjegoi faktin se trajneri është ende i lidhur në kontratë me skuadrën e Reggiana, por gjithçka pritet të zgjidhet shumë shpejt.
“Reggiana është një klub miqësor dhe shpresoj se gjithçka do të zgjidhet. Fakti që ishte një lojtar i madh mund të ndihmojë, Nesta ka bërë një rrugëtim, është rritur dhe vjen nga një kampionat shumë i mirë”,- u shpreh “numri 1” i skuadrës së Monza. /i.m /abcnews.al
