Pas ecurisë fantastike në kampionat, ku ka regjistruar vetëm fitore në vitin 2024, tashmë “Zikaltërit” e Inter kthejnë të gjithë vëmendjen, në atë çka mund të quhet përballja më e rëndësishme e këtij sezoni, teksa pasditen e së mërkurës do të luajnë ndeshjen e kthimit të fazës së 1/16-ve, të UEFA Champions League, ndaj “Los Colchoneros” së Atletico Madrid.
Padyshim mision i djemve të teknikut, Simone Inzaghi është të mbrojnë avantazhin minimal, 1 me 0, të siguruar vetëm tre javë më parë, në “mitikun” e Milanos, “Giuseppe Meazza”, me “bomberin” austriak, Marko Arnautovic, që tundi në fraksionin e dytë të lojës, rrjetën e Jan Oblak, për të afruar edhe më shumë të tijët, me çerekfinalet e këtij kompeticioni.
Siç e do zakoni një ditë para sfidës u zhvillua edhe konferenca për shtyp, në kuadër të kësaj sfide, nga ku tekniku i “Zikaltërve”, Simone Inzaghi theksoi se skuadra e tij nuk duhet ta ketë mendjen te avantazhi i ndeshjes së parë dhe të përqëndrohet maksimalisht pasi Atletico Madrid në “shtëpinë” e saj shndërrohet në një tjetër ekip.
“E vërteta është se nisemi me një avantazh minimal, por ndeshjen duhet ta luajmë sikur ai avantazh të mos ekzistonte. Atletico në shtëpi shndërrohet në një tjetër ekip, nëse do të luanin vetëm në “Metropolitano”, atëherë ata do të ishin kampionët e Spanjës. Pastaj të gjithë e dimë se çfarë trajneri është Diego Simeone.
Nuk e di se çfarë loje do të ndjekë Atletico ndaj nesh, por e di mirë se do të jetë shumë e vështirë. Kjo skuadër ka nisur prej kohësh një rrugëtim shumë të rëndësishëm, në vitin e parë ia kemi dalë të luajmë të barabartë edhe ndaj Real Madrid apo Liverpool, që më pas u takuan në finale. Në tre sezone kemi bërë shumë mirë dhe kjo nuk ka qenë diçka e lehtë”,- u shpreh Inzaghi. /i.m /abcnews.al
