Pas fitores ndaj “verdhekuqve” të Roma-s, tashmë “zikaltërit” e Inter do të udhëtojnë drejt transfertës së Bergamos, aty ku do t’i presë Atalanta e Berat Gjimshitit, në përballjen e vlefshme për javën e 11-të të kampionatit italian të futbollit, Serie A.
Siç e do zakoni para sfidës u mbajt edhe konferenca për shtyp, nga ku tekniku Simone Inzaghi, fillimisht foli për vështirësinë teknike e fizike të sfidës e më pas u ndal të fliste për formacionin e mundshëm, si dhe për performancat e deri më tani të “bomberit” francez, Marcus Thuram.
“Është një trasnfertë e vështirë, përballë një skuadre me një trajner si Gasperini, që prej shumë kohësh ka ndërtuar një futboll të bukur. Përballen dy skuadra shumë të forta fizikisht, ndaj do të jetë një ndeshje impenjative dhe vetëm nëse përqendrohemi maksimalisht, mund të marrim një rezultat pozitiv.
Për formacionin nuk kemi vendosur ende, por nuk ka rëndësi kush luan. E rëndësishme është të impenjohemi si duhet, pasi është transfertë e vështirë. Thuram është paraqitur me frymën e duhur që në 13 korrik, duke vënë theksin te grupi dhe jo te individi, teksa rezultatet e punës po shfaqen nga java në javë”,- tha tekniku italian. /i.m /abcnews.al
