Loading ...
Helmimi i nxënësve të shkollës së Postribës në Shkodër ka ndodhur pasditen e së enjtes. Në urgjencë u paraqitën më shumë se 50 raste, disa prej tyre në gjendje të rëndë për shëndetin. Por ende nuk ka dalë një rezultat që të tregojë çfarë e shkaktoi këtë intoksikim të fëmijëve.
Fëmijët e helmuar në Postribë po mbahen në vëzhgim të rreptë këtu në spitalin e Shkodrës.
Kurse personeli në repartin e infektivit është më në gatishmëri se herët e tjera.
Në dy ditët e alarmit më shumë se 50 fëmijë u paraqitën në urgjencë me temperaturë, të vjella dhe dhimbje barku. Disa prej tyre u rikthyen në urgjencë.
Prindërit u qëndrojnë te koka fëmijëve të tyre. Ata besojnë se helmimi u ka ardhur nga ushqimet që përgatiten pranë shkollës. Ky burrë thotë se nuk është nga Postriba, por vajza e tij i kërkoi një hamburger kur ai po kalonte pranë shkollës.
Fast-foodi i cili ndodhet në oborrin e shkollës së mesme të bashkuar në Postribë është i mbyllur.
AKU i vendosi kyçin vetëm një natë pas ngjarjes.
Edhe uji i pijshëm u ndërpre në shkollë si një masë emergjente deri në daljen e rezultateve të analizave.
Situata e krijuar në Postribë është shoqëruar me enigma orë pas ore. Pritet përgjigja e Drejtorisë së Shëndetit Publik dhe e AKU sëbashku për të mësuar shkakun e helmimit të fëmijëve. Kurse prokuroria dhe policia ka nisur hetimet paralele.
Gazetar i ABC News, Shkodër: Simon Shkreli
