FIFA gjatë mbrëmjes së kaluar dhuroi edhe një çmim të veçantë: atë të tifozit më të mirë për sezonin e kaluar. Fituesja ishte një nënë e mrekullueshme braziliane. Në skenë zbritën emra si Leo Messi, Jurgen Klopp, Allison dhe… Silvia Grecco.
Ajo dhe djali i saj janë tifozë të zjarrtë të Palmeiras. Nickollas nuk sheh dhe vuan nga autizmi, por zemra e tij rreh fort për ekipin brazilian dhe asgjë nuk e pengon të gëzojë e të vuajë sukseset dhe dështimet e Palmeiras.
Pranë tij është gjithmonë Silvia, nëna e tij e dashur që i komenton çdo episod të ndeshjes. Djaloshi 12-vjeçar rri e dëgjon gjithë emocion për të shpërthyer në festë së bashku në çdo gol të Palmeirasit të tyre.
Një histori e mrekullueshme dashurie, futbolli dhe jete; absolutisht çmimi më i merituar i dhënë në mbrëmjen e djeshme. /abcnews.al
