I grumbulluar me “gjelat” francezë në kuadër të përballjeve të radhës në kualifikueset e Euro 2024, “ylli” i Paris Saint-Germain, Kylian Mbappe u paraqit në konferencën për shtyp në prag të ndeshjes së të premtes ndaj Gjibraltarit.
Nga konferenca për shtyp, Mbappe foli për situatën e tensionar me klubin francez, teksa tha se i dërgoi një letër drejtuesve të PSG për t’i njoftuar se nuk do ta rinovojë kontratën përtej vitit 2024, ndërsa theksoi se nuk e mendonte se një letër do të merrte përmasa të tilla.
“Sinqerisht, nuk besoja se do të ofendoja me anë të një letre. Ishte vetëm një letër, nuk e mendoja se do të “vriste” ndokënd. E ardhmja? Në këtë moment kam vetëm një opsion, të qëndroj tek PSG. Në planin tim do të jem me skuadrën sapo të nisin përgatitjet për sezonin e ri. Presidenti Emmanuel Macron nuk do të ketë asnjë impakt në vendimin për të ardhmen time, ai dëshiron që unë të qëndroj te PSG.
Dhe, në fakt unë do të qëndroj, pra jemi në të njëjtin krahë. Njerëzit do të flasin, do të kritikojnë, por unë e di se çfarë do të bëj dhe se çfarë do të them. Shumë veta flasin, por nuk kanë informacionin e duhur”,- u shpreh Mbappe në fjalën e tij. /i.m /abcnews.al
