Sekretarja e Thesarit e SHBA-së, Janet Yellen i bëri thirrje sot Kongresit të rrisë kufirin e huamarrjes së qeverisë federale dhe të shmangë një skenar të paprecedentë të falimentimit, i cili do të shkaktonte një recesion ekonomik global dhe rrezikonte të minonte lidershipin e SHBA-së në ekonominë globale.
“Ngrirja e pagesave do të kërcënojë përfitimet për të cilat kemi punuar kaq shumë gjatë viteve të fundit në rimëkëmbjen tonë pas pandemisë. Dhe do të shkaktojë një recesion global”, theksoi ajo.
“Kjo gjithashtu rrezikon të minojë udhëheqjen e SHBA-së në ekonominë globale dhe do të ngrejë pyetje në lidhje me aftësinë tonë për të mbrojtur interesat tona të sigurisë kombëtare,” shtoi sekretarja amerikane.
Presidenti i SHBA-së Joe Biden tha të mërkurën se nëse Kongresi dështon të veprojë përpara se qeverisë federale t’i mbarojë paratë, gjë që mund të ndodhë që në 1 qershor, ekonomia e SHBA do të rrezikohet nga një recesion.
Yellen theksoi se lojërat politike të republikanëve për këtë çështje përbënin “një krizë të krijuar nga ne” dhe se kërcënimi i thjeshtë i një falimentimi mund të çojë në një ulje të vlerësimit të qeverisë së SHBA, siç bëri gjatë mosmarrëveshjes të vitit 2011.
Në të njëjtën kohë, ajo mund të rrisë normat e interesit për hipotekat, kartat e kreditit dhe kreditë e makinave, vuri në dukje Yellen. Biden këmbëngul se Kongresi ka një detyrë kushtetuese për të rritur kufirin e huamarrjes, i cili tashmë qëndron në 31.4 trilion dollarë. (28.6 trilion euro).
Por republikanët, të cilët kontrollojnë Dhomën e Përfaqësuesve, po e lidhin këtë rritje me shkurtime të mëdha në shpenzimet publike.
Për më tepër, ish-presidenti amerikan Donald Trump dje u kërkoi republikanëve të shkaktojnë një falimentim nëse nuk sigurojnë shkurtime “të mëdha” në shpenzimet publike nga administrata Biden.
/abcnews.al
