Franca po përgatitet për një ditë tjetër protestash dhe grevash kundër reformës së pensioneve, pasi nuk u arrit një rezultat në bisedimet midis qeverisë dhe sindikatave.
Sindikatat shpresojnë për një pjesëmarrje masive në ditën e 11-të të protestave që nga janari. Të gjithë janë në pritje të verdiktit më 14 prill mbi reformën nga Këshilli Kushtetues i Francës, i cili ka fuqinë të shfuqizojë disa apo edhe të gjithë legjislacionin.
Macron, aktualisht jashtë vendit për një vizitë në Kinë, po përballet me sfidën më të madhe të mandatit të tij të dytë, i cili përfshin rritjen e moshës minimale të pensionit nga 62 në 64 vjeç.
Protestat u shndërruan në trazira të dhunshme pasi kryeministrja Elisabeth Borne më 16 mars vendosi të kalojë projektligjin në Parlament pa votim.
“Është qartazi një dështim kur kryeministrja nuk po lejon as një rrugë për diskutim,” tha Cyril Chabanier, duke folur në emër të tetë sindikatave kryesore të vendit pas një orë bisedimesh.
Ishte mbledhja e parë e tillë midis dy palëve që kur qeveria prezantoi projektligjin e diskutueshëm të pensioneve në janar. Krerët e sindikatave u kanë bërë thirrje francezëve që të protestojnë të enjten.
Një numër rekord njerëzish, më shumë se 1.2 milionë, marshuan kundër reformës në mbarë vendin më 7 mars.
/abcnews.al
