Adriano Galliani ka përjetuar shumë gëzime sportive në karrierën e tij të gjatë menaxheriale, por nuk ka dyshime se ngjitja e Monza-s në kategorinë më të lartë të futbollit italian është arritja e tij më e madhe.
“Emocioni që ndjeva me promovimin e Monza në Serie A ishte më i madh se ai që ndjeva nga 5 fitoret e Champions League me Milanin”- u shpreh Galliani.
Në 31 vite në krye të klubit kuqezi, Galliani ka fituar gjithsej 29 trofe, por zemra e tij ka rrahur gjithmonë për Monzën.
“Unë kam qenë një tifoz i madh i Monzas që kur isha 5 vjeç, kam lindur këtu dhe kam qenë menaxher i klubit më parë se të mbërrija në Milano. Një nga gjërat që bëra më së miri nga të gjitha ishte ta bëja edhe presidentin Silvio Berlusconi një tifoz të madh të Monzas. Pa të nuk do të ishte e mundur të arrihej gjithë kjo”,- tha më tej ai. /i.m /abcnews.al
