Loading ...
Sonte, në orën 18:45, Juventusi do të luajë në transfertë ndaj Maccabi Haifa-s për raundin e 4 të Grupit H të Ligës së Kampionëve. Bardhezinjtë janë prapa në renditje në krahasim me PSG dhe Benfica, të cilët barazuan ndeshjen e fundit dhe kryesojnë grupin me 7 pikë , katër më shumë se Zonja e Vjetër, e cila ka vetëm 3 pikë, shkruan abcnews.al.
Izraelitët, nga ana e tyre, nuk kanë arritur ende të marrin pikë, dhe me një disfatë të mundshme sot, do të shkëputeshin ndjeshëm edhe nga gara për Europa League.
Anasjelltas, një tjetër sukses sonte, për Juventusin, është thelbësor. Për të arritur në 1/8, në fakt, djemtë e Massimiliano Allegrit nuk kanë zgjidhje: duhet të fitojnë të tre ndeshjet që kanë mbetur për t’u luajtur, duke goditur kështu kualifikimin pa i kushtuar vëmendje rezultateve të tjera.
Sigurisht që nuk është diçka e vogël, veçanërisht duke pasur parasysh që PSG do të mbërrijë në Allianz Stadium më 2 nëntor, në ndeshjen e gjashtë dhe të fundit të Grupit H. /G.D abcnews.al/
