Sekretari i Përgjithshëm i OKB: Bota është në rrezik të madh

Pas heqjes së kufizimeve për pjesëmarrje në prani të delegacioneve të vendeve anëtare të vendosura për shkak të pandemisë COVID-19 gjatë dy viteve të mëparshme, në mbledhjen vjetore në Nju-Jork ishin të pranishëm më shumë se 150 krerë shtetesh dhe qeverish.

Bota e ndarë nga kriza të shumta

Mbledhja më e madhe vjetore e OKB-së zhvillohet në një moment që bota është e ndarë nga kriza të shumta, në krye të të gjithave lufta në Ukrainë.

Guterres u tha atyre se kombet janë “bllokuar në një mosfunksionim kolosal global” dhe nuk janë të gati apo të gatshme për t’u përballur me sfidat kryesore që kërcënojnë të ardhmen e njerëzimit dhe fatin e planetit.

“Besimi po shkërmoqet, pabarazitë po shpërthejnë, planeti ynë po digjet. Njerëzit po lëndohen dhe më të pambrojturit po vuajnë më tepër”, tha ai.

Shefi i OKB-së tha se megjithatë ka shpresë. Duke theksuar se bashkëpunimi dhe dialogu janë e vetmja rrugë përpara, ai paralajmëroi se “asnjë fuqi apo grup nuk mund ta ketë i vetëm fjalën”.

“Le të punojmë si një, si një koalicion botëror, si kombe të bashkuara,” u kërkoi ai udhëheqësve të mbledhur në sallën e madhe të Asamblesë së Përgjithshme.

Lufta në Ukrainë dhe krizat ekonomike e mjedisore në qendër të vëmendjes

OKB-ja bëri një përjashtim të veçantë për presidentin ukrainas Volodymyr Zelenski i cili u lejua ta regjistronte paraprakisht fjalimin e tij për shkak të “të vazhdimit të pushtimit të huaj” dhe veprimeve ushtarake që kërkojnë që ai të kryejë “detyrat e tij për mbrojtjen dhe sigurinë kombëtare”.

Josep Borrell dhe Antonio Guterres

“Këtë vit, Ukraina do të jetë shumë lartë në agjendë. Kjo është e pashmangshme,” u tha gazetarëve në Nju-Jork diplomati i lartë i BE-së Josep Borrell. “Ka shumë probleme të tjera, ne e dimë. Por lufta në Ukrainë ka dërguar valë tronditëse në mbarë botën,” shtoi ai.

/abcnews.al/