Rusia ka ndaluar furnizimin me naftë për tre vende europiane nëpërmjet Ukrainës, pasi një transaksion bankar u refuzua për shkak të sanksioneve të Moskës.
Transportuesi rus i hidrokarbureve, Transneft, tha në një deklaratë se pagesa e saj për të drejtat e tranzitit përmes Ukrainës për muajin gusht, e cila u bë më 22 korrik, u refuzua më 28 korrik për shkak se sanksionet e caktuara kundër Moskës hynë në fuqi.
Si rezultat, kompania ukrainase UkrTransNafta “ka ndaluar që nga 4 gushti ofrimin e shërbimeeve për transportin e naftës përmes territorit ukrainas”.
Këto janë dërgesa nëpërmjet një dege të gazsjellësit Druzhba që kalon përmes Ukrainës dhe u shërben tre vendeve evropiane pa dalje në det, Hungarisë, Sllovakisë dhe Republikës Çeke.
Dërgesat në Poloni dhe Gjermani, nëpërmjet një dege tjetër të Druzhba që kalon përmes Bjellorusisë, vazhdojnë pa probleme, tha Transneft.
Pavarësisht ofensivës ushtarake të Moskës në Ukrainë që nga fundi i shkurtit, nafta dhe gazi natyror rus vazhdojnë të rrjedhin përmes Ukrainës drejt Bashkimit Evropian, anëtarët e të cilit varen shumë nga hidrokarburet e Moskës.
BE-ja në qershor miratoi një embargo me faza ndaj naftës ruse, kryesisht duke kërkuar fundin e importeve të papërpunuara me anije brenda gjashtë muajve.
Furnizimet përmes tubacionit të Druzhbës u lejuan të vazhdonin përkohësisht, pa një datë të caktuar përfundimi, një vendim i kërkuar nga kryeministri hungarez Viktor Orbán, i cili ruan marrëdhëniet me Vladimir Putin dhe vendi i të cilit është 65% i varur nga nafta ruse. /abcnews.al
