Në ditën botërore të sindromës Doën, ministrja e Shëndetësisë dhe Mbrojtjes Sociale, Ogerta Manastirliu ka ndarë lajmin e rijetësimit të laboratorit të gjenetikës në maternitetin “Mbretëresha Geraldinë”. Investimi do të mundësojë realizmin e disa prej analizave për zbulimin e diagnozave të paralindjes falas.
Gratë në pritje për t’u bërë nëna, të cilat dyshojnë se fetusi i tyre mund të mbarti probleme tashmë kanë mundësi që analizën e ADN-së dhe një sërë analizash të tjera për zbulimin e diagnozës së paralindjes ta kryejnë falas në laboratorin e gjenetikës në maternitetin “Mbretëresha Geraldinë”.
Ministrja e Shëndetësisë dhe Mbrojtjes Sociale, Ogerta Manastirliu në ditën ndërkombëtare të sindromës Down ka ndarë lajmin për rijetësimin e tij. 12 milionë lekësh nga buxheti i shtetit janë investuar për aparatura të fjalës së fundit të teknologjisë.
“Rijetësimi i laboratorit të Diagnozës Molekulare në Maternitetin “Mbretëresha Geraldine”, bën të mundur realizimin e disa analizave shumë të rëndësishme për sa i përket diagnozve prenatale, siç janë analiza e AND-së dhe një seri analizash të tjera për diagnozat prenatale që do të kryhen në sajë të këtij investimi”.
Përveç këtij investimi, ministrja e Shëndetësisë bëri të ditur se analiza të reja janë shtuar dhe në laboratorin e gjenetikës në Qendrën Spitalore “Nënë Tereza”, të cilat ndihmojnë për identifikimin e diagnozave gjenetike.
