Kriminelët pastruan 8.6 miliardë dollarë kriptomonedhë në 2021, me 30% më shumë se një vit më parë, thuhet në një raport të kompanisë të të dhënave “Chainalysis”. Në raport thuhet se policia mund të japë një “goditje të madhe” duke synuar shërbimet kryesore të përdorura për pastrimin e kriptomonedhave nga kriminelët. Kompania më parë vlerësoi se kriminelët morën një rekord prej 14 miliardë dollarësh në kriptovaluta në vitin 2021.
Agjencia Kombëtare e Krimit e Mbretërisë së Bashkuar i tha “BBC-së” se forcat ligjore po reagojnë. Chainalysis thotë se gjurmon kuletat e kriptomonedhave të kontrolluara nga kriminelë të tillë si hakersat, mashtruesit, trafikantët e qenieve njerëzore, operatorët e tregut të rrjetit të errët dhe grupet terroriste. Chainalysis duke ndjekur flukset e kriptomonedhave nga adresat e lidhura me aktivitetin kriminal ishte në gjendje të vlerësonte sasinë e “pastruar”.
Kompania thotë se shumica e kriptomonedhave pastrohen përmes një numri të kufizuar shërbimesh për shembull, shkëmbime të veçanta të favorizuara nga kriminelët dhe mbyllja e tyre mund të ketë një ndikim të madh. Raporti vë në dukje se “ndërsa kriptovalutat me vlerë miliarda dollarë lëvizin nga adresa të paligjshme çdo vit, shumica e tyre përfundon në një grup çuditërisht të vogël shërbimesh, shumë prej të cilave duken të krijuara me qëllim për pastrim parash”.
Në raport shkruhet gjithashtu se: “Zbatimi i ligjit mund të japë një goditje të madhe kundër krimit të bazuar në kriptovaluta dhe të pengojë ndjeshëm aftësinë e kriminelëve për të hyrë në asetet e tyre dixhitale duke ndërprerë këto shërbime”. Sipas një raporti të Europolit, të publikuar gjithashtu të mërkurën, rrjetet kriminale të specializuara në pastrimin e parave në shkallë të gjerë “kanë adoptuar kriptovalutat dhe po ofrojnë shërbimet e tyre për kriminelët e tjerë”.
Kreu i hetimit financiar në Agjencinë Kombëtare të Krimit në Mbretërinë e Bashkuar, Gary Cathcart, tha: “Ndërsa sasia e madhe e përdorimit dhe shkëmbimit të kriptomonedhave është për arsye legjitime, kriminelët e organizuar kanë identifikuar përfitimet që u ofron kriptomonedha”. Ai tha gjithashtu që “ka pjesë të strukturës së kriptomonedhës që po shfrytëzohen për të pastruar paratë kriminale, veçanërisht nga tregtia e drogës.” / abcnews.al
