Ish-senatorja kolumbiane, Ingrid Betancourt, ka njoftuar se do të kandidojë sërish për presidente, 20 vjet pasi u rrëmbye nga rebelët e majtë. Zonja Betancourt ishte duke bërë fushatë në zgjedhjet presidenciale të vitit 2002, kur ajo u rrëmbye nga rebelët e FARC dhe u mbajt peng për më shumë se gjashtë vjet. Ajo është zotuar se do të luftojë korrupsionin dhe varfërinë nëse fiton zgjedhjet. “Sot jam këtu për të përfunduar atë që kam filluar,” u tha ajo mbështetësve në kryeqytetin e vendit, Bogota.
Gustavo Petro, ish-kryebashkiaku i majtë i Bogotas dhe dikur një anëtar i grupit revolucionar gueril M-19, aktualisht kryeson në sondazhet e opinionit. Shumë kolumbianë e shohin atë si një alternativë ndaj presidentit aktual të qendrës së djathtë, Ivan Duque, i cili nuk mund të kërkojë rizgjedhjen për shkak të kufizimeve të mandatit dhe rënies së popullaritetit në sondazhet e fundit. Pavarësisht famës së saj ndërkombëtare, zonja Betancourt ka mbajtur një profil të ulët që nga shpëtimi i saj në 2008 nga forcat ushtarake kolumbiane dhe përballet me një betejë të ashpër primare për të fituar nominimin e koalicionit centrist që përfshin partinë e saj, Green Oxygen.
Me votat paraprake vetëm dy muaj larg, ajo pritet të paraqesë veten si një kandidate e pajtimit në një vend ku më shumë se nëntë milionë njerëz janë të regjistruar në qeveri si viktima të konfliktit raporton “BBC”. Zonja Betancourt po udhëtonte për një takim elektoral në qytetin e San Vicente del Caguan më 23 shkurt 2002 kur ajo u ndalua në një postbllok dhe u mor peng nga FARC. Gjatë gjashtë viteve të robërisë së saj në xhunglën kolumbiane, ajo u trajtua brutalisht nga robëruesit e saj, përpara se spiunët e ushtrisë kolumbiane brenda rebelëve të FARC të orkestronin shpëtimin e saj në korrik 2008.
Ajo e ka kaluar pjesën më të madhe të kohës duke jetuar jashtë vendit në Francë me familjen e saj. Rebelët e FARC luftuan një luftë të egër civile me qeverinë për më shumë se 50 vjet, duke vrarë më shumë se 200,000 njerëz. Grupi nënshkroi një marrëveshje paqeje me qeverinë në vitin 2016 dhe më pas hyri në parlament, por disa grupe të ndara mbeten në luftë me qeverinë. / abcnews.al
