Omicron po vijon të përhapet me shpejtësi dhe të rrisë numrin e infektimeve në shumë vende.
Bosnje Hercegovina ka regjistruar dhjetë rastet e para me variantin e ri të koronavirusit, raporton reuters.
Goran Çerkez, këshilltar i Ministrisë së Shëndetësisë në Federatën boshnjake e kroate të Bosnjës, tha se rastet u konstatuan pas testimeve të kryera nga Qendra Klinike Universitare e Sarajevës.
“Nuk kemi asnjë dyshim se Omicroni veçse ka qenë duke qarkulluar në Bosnje dhe se në muajt e ardhshëm do të shndërrohet në variant dominues”, tha Çerkez për agjencinë Reuters.
Bosnja nuk ka Ministri kombëtare të Shëndetësisë, por 13 qeveritë rajonale kanë ministritë përkatëse, të cilat kanë statistikat e tyre lidhur me pandeminë.
Sipas shifrave zyrtare, vetëm rreth 30% e popullsisë së Bosnjës është vaksinuar kundër koronavirusit. Në raportime paralajmërohet që shumë shpejt vendi mund të jetë i “sunduar” nga varianti i ri duke qenë se është më ngjitës.
Kujtojmë se Omicron ka shënuar rekord rastesh në disa vende, mes tyre Greqia, Britania e Franca. be.k/abcnews.al
