Gjermani
ent ela13:15 | 21/09/2019
Qeveria gjermane miratoi një paketë për mbrojtjen e klimës që do të ketë një buxhet prej 54 miliard eurosh deri në vitin 2023. Koalicioni qeverisës në Gjermani ka arritur të plotësojë deri tani të gjitha objektivat klimatike të vendosur për 2020-ën.
Duhej një mbledhje qeverie maratonë prej 19 orësh në mënyrë që ekzekutivi gjerman të miratonte një marrëveshje për paketën në mbrojtje të klimës.
Projektligji në fjalë ka si objektiv kryesor reduktimin e emetimeve të gazrave me 55 për qind Brenda vitit 2030. Masat do të financohen nga futja në fuqi e nëj takse për emetimet e dioksidit të karbonit: do të jetë 10 euro për ton deri në vitin 2021 dhe do të shkojë deri në 35 euro për ton në katër vitet e ardhshme
Qeveria gjermane ka premtuar për një buxhet prej 54 miliard eurosh Brenda vitit 2023 dhe 100 miliard euro deri në vitin 2030.
Paketa përmban masa mbështetëse si shtimi i infrastrukturës për këmbësorët, asistencë për automjetet elektrike dhe ulja e cmimeve të biletave të trenit.
Plani parashikon një përforcim të transportit hekurudhor duke investuar pjesën më të madhe të fomdeve të premtuara në infrastrukturën hekurudhore. Mes burimeve të financimit, parashikohet taksë më e madhe për fluturimet.
Marrëveshja mes CDU-së dhe socialdemokratëve u arrit në të njëjtën kohë me manifestimin e madh për klimën në disa qytete të mëdha në të gjithë botën. Koalicioni qeverisës në Gjermani ka arritur të plotësojë deri tani të gjitha objektivat klimatike të vendosur për 2020-ën. /ABC News Albania 24/7
ent ela09:40 | 21/09/2019
Një shqiptar është gjetur i vrarë në Gjermani. Viktima është një 27-vjeçar, por identiteti i tij nuk bëhet i ditur.
Trupi i pajetë është gjetur në Dölauer Heide disa ditë më parë. Në trupin e viktimës kishte plagë të shkaktuara nga arma dhe goditjet me thikë. Hetuesit gjermanë thonë se 27-vjeçari shqiptar ishte vrarë në mënyrë barbare.
Trupi i pajetë u gjet në një kanal në një zonë të pyllëzuar. Trupi i 27 vjeçarit shqiptar ishte fshehur nën gjethe në një kanal, ndërkaq u identifikua nga ADN-ja e tij. Identiteti i tij nuk është bërë i ditur për media
Është ende e paqartë nëse shqiptari ishte vrarë në vendin ku u gjet apo ishte sjellë aty pas ekzekutimit në ndonjë zonë tjetër.
Zbulimi i trupit u bë rastësisht të dielën nga një kalimtarë të rastit.
Policia po heton këtë ngjarje, shkruajnë mediat gjermane, për të identifikuar dhe arrestuar autorët. /abcnews.al
G. P.15:38 | 17/09/2019
Sekretari i Shtetit në Gjermani, Christian Lange, u prit sot në një takim nga Kryetari i Kuvendit Gramoz Ruçi. Në këtë takim, sipas njoftimit të zyrës së shtypit të Kuvendit, zyrtari gjerman pohoi se qeveria gjermane po lobon fort Bundestag për një “PO” për çeljen e negociatave të Shqipërisë me BE.
Mes të tjerash, sekretari i shtetit gjerman pohoi se ishte i impresionuar nga reforma në drejtësi, ndërsa shtoi se me po këto ritme duhet të ecë edhe reforma zgjedhore.
Lange tha në takimin me kryeparlamentarin se Shqipëria dhe gjithë Ballkani Perëndimor janë në fokusin e veçantë të Gjermanisë. Ecuria e reformave në Shqipëri, sipas tij, është e suksesshme dhe kjo u konfirmua nga të gjithë faktorët ndërkombëtarë.
Më 18 Tetor, Këshilli Europian pritet të japë vendimin lidhur me çeljen e negociatave te BE me Shqipërinë dhe Maqedoninë e Veriut./ABC News Albania 24/7
ent ela09:30 | 17/09/2019
Presidenti amerikan Trump kërcënon se do t’i tërheqë trupat amerikane nga Gjermania. Ai ngrihet kundër një tradite që ekziston prej më shumë se 70 vjetësh. Të dyja shtetet kanë kohë që kanë interesa të përbashkëta.
Për një kohë të gjatë Republika Federale e Gjermanisë ishte një shtet në vijën e parë të frontit. Pas përfundimit të Luftës së Dytë Botërore, ajo kufizohej drejtpërdrejt me disa nga shtete komuniste, të sunduara nga ish-Bashkimi Sovjetik në Evropën Lindore. Pas humbjes së luftës nga “Rajhu i Tretë”, Gjermania u bë një pjesë e rëndësishme e strategjisë amerikane të mbrojtjes në Evropë. Në veçanti, gjatë pushtimit nga aleatët pas Luftës së Dytë Botërore, prej vitit 1945 deri në vitin 1955, në Gjermani u stacionuan rreth 400.000 ushtarë të huaj, gjysma e tyre amerikanë.
Prej atëherë numri i trupave ka rënë në mënyrë drastike, por ushtria amerikane vazhdon të jetë e pranishme me një numër të konsiderueshëm trupash në Gjermani, pavarësisht nga mosmarrëveshja aktuale për kostot e stacionimit në Gjermani. Ekziston gjithashtu një numër i madh bazash ushtarake amerikane.
Sot, rëndësia strategjike e Gjermanisë për SHBA pasqyrohet në selinë e “Komandës Evropiane të SHBA” (EUCOM), e vendosur në jugperëndim të Stuttgartit. Ajo është instanca qendrore e koordinimit për të gjitha forcat amerikane në 51 vende kryesisht evropiane.
Detyra e EUCOM-it është mbrojtja edhe ushtarakisht e Shteteve të Bashkuara. Kjo arrihet me anë të një veprimtarie me të cilën qendra e komandës parandalon konfliktet sa më shumë që të jetë e mundur, por në rast dyshimi vepron edhe si parandaluese. Ajo gjithashtu mbështet aleancën e përbashkët të mbrojtjes të NATO-s dhe kundërvepron ndaj kërcënimeve transnacionale. Nën komandën e EUCOM-it janë edhe US Army Europe (Ushtria Amerikane Evropë), US Air Forces (Forcat Ajrore të SHBA) në Evropë dhe US Marine Corps Forces Europe (Forcat Detare të SHBA në Evropë), të gjitha këto kanë degë në Gjermani.
Dimensionet e një dislokimi
Në tërësi, Gjermania strehon rreth 38.600 ushtarë, që është pjesa më e madhe e trupave amerikane në Evropë. Sidoqoftë, shifrat ndryshojnë, pasi trupat zhvendosen vazhdimisht në vende të tjera. Pas Japonisë, Gjermania është vendi ku janë vendosur kontingjentet më të mëdhenj të ushtrisë amerikane në të gjithë botën.
Por shifrat vitet e fundit kanë rënë. Sipas Qeverisë Federale, numri i trupave amerikane të stacionuara në Gjermani, midis viteve 2006 dhe 2018 më shumë se është përgjysmuar: nga 72.400 në 33.250. Shkaku i rënies është situata e ndryshuar e sigurisë globale, së cilës ushtria amerikane i është përgjigjur me zhvendosje trupash.
Marinsa, ushtarë dhe forca ajrore
Sipas shifrave të publikuara nga ushtria amerikane, pesë garnizonet aktualisht kanë rreth 29.000 ushtarë. Këtu përfshihet edhe “Korpusi Detar i Evropës dhe Afrikës” me qendër në Böblingen në jugperëndim të Gjermanisë.
Veç kësaj rreth 9600 ushtarakë të Forcave Ajrore të SHBA janë të stacionuar në vende të ndryshme në Gjermani, siç janë dy bazat e Forcave Ajrore të SHBA, Ramstein dhe Spangdahlem.
Ushtria amerikane në Gjermani: më shumë sesa thjesht trupa
Në objektet ushtarake amerikane janë të punësuar jo vetëm ushtarë, por edhe civilë amerikanë. Për më tepër, shumë ushtarakë sjellin edhe familjet e tyre jashtë shtetit. Në këtë mënyrë, rreth bazave të SHBA janë krijuar komunitete të mëdha civile. Disa prej tyre, siç është baza ajrore e Ramsteinit, janë bërë qytete të vogla. Në to bëjnë pjesë jo vetëm kazerma, aeroporte, terrene trajnimi dhe depo materialesh, por edhe qendra tregtare, shkolla, shërbime postare dhe polici. Dollari amerikan është monedha kryesore e ligjshme për pagesa.
Edhe baza më e madhe në botë e ushtrisë amerikane është gjithashtu në Gjermani, përkatësisht Bavaria-Garnison pranë Grafenwöhr, në kufi me Republikën Çeke. Me një sipërfaqe prej mbi 390 kilometra katrorë, ajo ua kalon të gjitha bazave të tjera të SHBA. Atje gjithashtu jetojnë më shumë njerëz që jetojnë në çdo institucion tjetër ushtarak amerikan, rreth 4000 ushtarë dhe të afërmit e tyre.
Në baza shpesh punojnë edhe shumë banorë vendas. Kështu, bazat janë gjeneruese stimujsh ekonomikë për komunat gjermane përreth, ndërmarrjet e të cilave ofrojnë mallra dhe shërbime. Kur u mbyllën disa baza, si garnizoni i ushtrisë në Bamberg në vitin 2014, kjo pati një pati pasoja të ndjeshme në ekonominë lokale. Edhe për këtë arsye, shumë gjermanë që punojnë pranë baza ushtarake amerikane shprehen kundër një pakësimi të mundshëm të trupave.
Kritika ndaj bazave
Por SHBA nuk i stacionojnë avionët e tyre vetëm në bazat e veta. Një numër i madh ndodhet edhe në bazat joamerikane të Forcave Ajrore në Gjermani. Përveç kësaj, në bazë të marrëveshjes bërthamore ushtarake të NATO-s, në bazën ajore gjermane në Buchel në Gjermaninë perëndimore janë stacionuar rreth 20 armë bërthamore – një fakt që shumë gjermanë e kritikojnë ashpër.
Po aq i diskutueshëm është edhe fakti që baza e Forcave Ajrore Ramstein përdoret si qendër kontrolli për sulmet me avionë në Jemen dhe në vende të tjera. Edhe kjo i zemëron shumë gjermanë.
Angazhimi financiar i Gjermanisë
Qeveria gjermane, në shtatë vitet e fundit ka vënë në dispozicion të trupave amerikane të stacionuar në vend rreth 243 milion euro si mbështetje. Kjo shumë përfshin pagesa pensioni për ish-punëtorët, si dhe shpenzime për mirëmbajtjen e ndërtesave dhe të tokave.
Për më tepër, qeveria gjermane vuri në dispozicion 480 milion euro të tjera për të mbuluar kostot e ndërtimit të lidhura me NATO-n në Gjermani. Ata shkuan “pothuajse plotësisht” në tokat e ushtrisë amerikane, siç doli në pah nga një përgjigje e Ministrisë së Financave ndaj një pyetjeje parlamentare të Partisë E Majta. /DW
ent ela09:40 | 16/09/2019
Enti Federal i Mjedisit ka gjetur thuajse te të gjithë fëmijët e kontrolluar mbetje plastike. Disa syresh janë të dëmshme për shëndetin. Gjithsej janë kërkuar 15 lëndë plastike te ndryshme te 2500 fëmijë.
Studimi bazohet në analiza të bëra në periudhën 2003-2017. Rezultati i tyre është alarmues: “Mbeturinat e 11 lëndëve plastike janë gjetur në urinën e 97 përqind fëmijëve. “Kjo, sigurisht, është dramatike. Lëndë të tilla nuk duhet të gjenden në trupat e fëmijëve”, tha zëdhënësja e Grupit Parlamentar të Të Gjelbërve në Bundestag, Bettina Hoffmann. Veç kësaj, lëndë të tilla, që dëmtojnë hormonet, supozohet të luajnë një rol nxitës në të ashtuquajturat sëmundjet e civilizimit, siç janë obeziteti, çrregullimet e fertilitetit, kanceri dhe vonesat në zhvillim.
Më të vegjlit janë më të prekurit
Studimi citohet në një përgjigje të qeverisë gjermane ndaj një pyetjeje të grupit parlamentar “Të Gjelbrit” për dëmtimin e popullsisë nga mbetjet kimike. Ai nxjerr në pah se se sa më i lartë të jetë prodhimi i lëndëve plastike, aq më shumë gjenden ato në trupat e fëmijëve, i tha bashkautorja e studimit, Marike Kolossa-Gehring, revistës së përjavshme, DerSpiegel.
Sipas saj, grupmosha më e ndjeshme është ajo e fëmijëve parashkollorë. “Është e papranueshme që çdo i katërti fëmijë – midis moshave tre dhe pesë vjeçare – të ketë aq shumë mbeturina plastike në trup, sa të mos përjashtohet me siguri rreziku i dëmit nga këto lëndë toksike,” ankohet Hoffmann.
Më shqetësueset janë sidomos nivelet e larta të acidit perfluorooctanoic (PFOA). Ai përdoret, për shembull, për veshjet e aktiviteteve në natyrë. Sipas Agjencisë Federale të Mjedisit, kjo lëndë dëmton fertilitetin dhe mëlçinë. Vitin e ardhshëm, ky acid do të jetë i ndaluar në të gjitha vendet e BE-së.
Familjet më të varfra janë më të prekura
Në këtë studim, Agjencia Federale e Mjedisit ka pyetur edhe për ambientin në të cilin jetojnë fëmijët, se a jetojnë buzë një rruge me shumë trafik, a pihet duhani në shtëpi, cilat prodhime përdoren më shpesh në jetën e përditshme, për shembull, a përdoren detergjentë të ashpër në pastrim ose zbutës pas larjes së rrobave, çfarë lëndësh përdoren në shtëpi për mbulesa, perde apo qilima. Rezultati: te fëmijët që rriten në familje të varfra janë gjetur më shumë mbetje plastike se te fëmijët me një status të lartë shoqëror.
Nga këndvështrimi i të Gjelbërve, këtu nevojitet ndërhyrja e politikës. Nuk mjafton përpjekja e konsumatorëve të shmangin përdorimin e panevojshëm të plastikës. “Askush nga ne nuk mund të mbrohet vetë nga ky rrezik”, thotë Hoffmann. “Ne nuk e dimë se ku janë këto lëndë. Prandaj politika duhet të marrë përsipër t’i ndalojë këto lëndë në treg.
Edhe pas shume kohe ende ne trup
Se sa e rëndësishme është që lëndë të tilla të dëmshme të hiqen nga qarkullimi, këtë e dëshmon edhe një tjetër rezultat i studimit afatgjat të Entit Federal të Mjedisit. Në trupat e fëmijëve janë gjetur edhe mbeturina plumbi ose të një pesticidi të ndaluar prej shumë kohësh, DDT, megjithëse në periudhën e studimit, 2003-2017, ndotja me këto lëndë ka qenë shumë e ulët. Por shumë shpesh, derisa këto substanca të zhduken përfundimisht, duhet të kalojnë vite të tëra. /DW
G. P.10:44 | 13/09/2019
Kryeministri Rama është sot në Berlin ku u takua me kancelaren Merkel. Kreu i qeverisë shqiptare tha pas takimit se kishte marrë vlerësime pozitive nga Merkel, të cilën e quan një mike të vërtetë. Vetë kancelarja gjermane ndau një foto me ndjekësit, duke thënë se Edi Rama është edhe artist dhe i kishte dhuruar librin e tij të fundit.
18 Tetori është afër dhe Edi Rama po shfrytëzon edhe ditët e fundit për të marrë një dritë jeshile për hapjen e negociatave. Pas Pragës, kryeministri shqiptar shkoi në Berlin ku zhvilloi një takim me kancelaren Angela Merkel. Pas bisedës 50 minutëshe, Rama u shpreh optimist, duke thënë se kishte marrë mbështetje nga një mike e vërtetë për hapjen e negociatave.
“Në Kancelarinë Federale për të kërkuar PO-në për Shqipërinë. Shumë i inkurajuar nga vlerësimet dhe predispozita pozitive ndaj Shqipërisë e kancelares Merkel. Mike e vërtetë”.
Edhe kancelarja Merkel ndau me ndjekësit e saj në rrjetet sociale takimin me Edi Ramën. Por ndryshe nga Rama, Merkel është fokusuar tek libri që i është dhuruar.
“Kancelarja Merkel mirëpriti Edi Ramën, kryeministër i Shqipërisë. Politikani është gjithashtu një artist dhe i solli kancelares librin e tij të fundit si një suvenir”, shkruhet në faqen e kancelares në Instagram.
Pak më vonë, në faqen zyrtare të kancelarisë, u publikua një njoftim për takimin.
“Kancelarja priti të premten Kryeministrin shqiptar Edi Rama në Kancelarinë Federale. Bisedimet e saj u përqendruan në marrëdhëniet bilaterale, por edhe në çështjet e politikës evropiane dhe çështjet rajonale. Në fund të Shtatorit, Bundestagu do të vendosë nëse kancelarja Angela Merkel mund të pranojë hapjen e negociatave të anëtarësimit në BE me Shqipërinë në samitin e BE në mesin e Tetorit”.
Më herët, Edi Rama zhvilloi dhe një bashkëbisedim me Komitetin e Çështjeve Europiane të Bundestagut. Kryeministri e vlerësoi takimin si të hapur dhe pozitiv.
“Në Komitetin e Çështjeve Europiane të Bundestagut për të kërkuar PO-në e parlamentit gjerman për Shqipërinë. Bashkëbisedim i hapur dhe pozitiv”.
Vendet skeptike që ende nuk janë shprehur janë Franca dhe Holanda. Vendimi për Shqipërinë dhe Maqedoninë do të merret në mes të Tetorit.
/ABC News Albania 24/7
G. P.09:07 | 13/09/2019
Organizata për ndihma Malteser ka publikuar një raport për migracioni, ku jepen lajme të mira për ekonominë. 130 faqe plot fakt japin shpresë se ekonomia po shkon në drejtim të duhur. Edhe integrimi i të huajve.
Në faqen e parë të raportit të organizatës Malterser për integrimin e fuqisë së ardhur punëtore shihet një burrë para një banke. Ai duket shumë i kënaqur, e shikuar nga raporti 130-faqësh, ai edhe mund të jetë i kënaqur. Në raport flitet për “përparime habitëse”, kur bëhet fjalë për gjendjen e migrantëve të futur në tregun gjerman të punës.
Qëllimi i shoqatës Malteser ka qenë që në kohën e debateve të nxehta të paraqesë një raport me sa më shumë fakte. Botuesi i raportit është një organizatë katolike, e cila ndihmon edhe procesin e integrimit. Përgjegjës për pjesën shkencore në Malteser është Instituti Walter-Eucken. Drejtori Lars Feld konstaton: “Integrimi gjatë viteve të fundit, madje edhe integrimi i refugjatëve, ka qenë shumë më i mirë se sa që është menduar në fillim.”
Lajme të mira, të cilat kanë të bëjnë në radhë të parë me futjen e fuqisë punëtore të huaj në tregun e punës në Gjermani. Integrimin më të mirë në këtë fushë e kanë arritur migrantët nga vendet prej nga ka ardhur numri më i madh i refugjatëve – nga Afganistani, Eritrea, Iraku, Irani, Nigeria, Pakistani, Somalia dhe Siria. Krahasuar me prillin e vitit 2017, numri i të punësuarve nga ky grup i njerëzve është dyfishuar: Në prill të vitit 2019 ka pasur rreth 312.000 persona të punësuar.
E ngarkuara më çështjet e integrimit në qeverinë gjermane, Annette Widmann-Mauz, e vlerëson këtë si sukses. “Zhvillimet në katër vitet e fundit kanë qenë shumë më pozitive, se sa që kanë menduar ekspertët”, thotë ajo për gazetën “Rheinische Post”.
Disponimi i përgjithshëm
Optimizmi po rritet edhe tek banorët tjerë të Gjermanisë – të paktën sa i përket integrimit të migrantëve dhe efekteve në ekonomi. 36,1 % e gjermanëve e shohin ardhjen e migrantëve dhe refugjatëve si një shans për ekonomi. Kjo do të thotë se besimi i gjermanëve ndaj këtyre kategorive është shtuar për 9 % më shumë, në krahasim me vitin 2016. Besimi është rritur për shkak të procesit të suksesshëm të integrimit në tregun e punës dhe uljes së numrit të azilkëkruesve.
Por njëkohësisht është rritur edhe numri i njerëzve të shqetësuar për sigurinë në Gjermani. Vitin e fundit plot 71,6 % e të anketuarve e shohnin ardhjen e azilkërkuesve si një rrezik për sigurinë në vend. Kjo do të thotë dy përqind më shumë se në vitin 2016.
Ndërkohë që Gjermania është një vend shumë më i sigurt se sa në vlerësimet e të anketuarve, jo vetëm në kontekstin e migrantëve por në përgjithësi. Niveli i kriminalitetit në Gjermani ka rënë vitet e fundit. Gjatë vitit 2009 ka pasur rreth gjashtë milionë vepra penale, ndërsa në vitin 2018 vetëm rreth 5,4 milionë. Vitin e kaluar janë kapur rreth 1,93 milionë persona që kanë bërë vepra të ndryshme kundërligjore. 69,5 % prej tyre kanë qenë gjermanë, ndërsa 30,5 % me origjinë të huaj.
Problemi mund të zgjidhet
Raporti i parë i Malteser për migrantët është botuar në vitin 2017. Në këtë raport është prezantuar influenca e refugjatëve dhe të ardhurve të tjerë në sistemin financiar në Gjermani. Sipas dokumentit, një azilkërkues paraqet ngarkesë edhe më të madhe për sistemin, në qoftë se potencialet e tij nuk shfrytëzhohen në tregun e punës. Tre vite më pas vjen bilanci i parë: Integrimi i refugjatëve në tregun gjerman të punës po shkon më shpejt se sa që ishte planifikuar. Përveç kësaj, asokohe është llogaritur me një numër edhe më të madh të të ardhurve në Gjermani.
Në këtë mënyrë janë zvogluar edhe shpenzimet për ndihmat sociale. Karl Prinz zu Löwenstein nga organizata Malteser konstaton: Raporti dëshmon se “integrimi i të ardhurve, pra edhe i refugjatëve, ka qenë një problem i zgjidhshëm për Gjermaninë. Kjo vlenë në veçanti për sektorin e financave.”/DW
ent ela14:55 | 06/09/2019
Gjermania pret në mbrëmje kombëtaren e Hollandës. Një duel ku do të vendoset shumë rreth fateve të tulipanëve. Mesfushori i Gjermanisë Toni Kros e konsideron si ndeshjen më të rëndësishme në këto kualifikuese.
Gjermani-Hollandë është kryendeshja e grupit C. Një sfidë nga ku do të vendoset jo pak rreth fateve të Hollandës që rrezikon të mbetet jashtë europianit të vitit të ardhshëm edhe pse është e tejmbushur me yje. Irlanda e Veriut kryeson grupin dhe ndiqet nga Gjermania me tre pikë më pak, ndërkohë që tulipanët janë vetëm në vendin e tretë plot 6 pikë larg pancerave. Trajneri i Gjermanisë Hoakim Lev do të bëjë disa ndryshime për këtë takim, ndërkohë që në kampin kundërshtar nuk ka ndryshime.
Mesfushori dhe lideri i mesit të fushës te Gjermania, Toni Kros e konsideron takimin në fjalë si më të rëndësishmin në këto kualifikuese për kombëtaren e tij si dhe kërkon përqendrim maksimal nga lojtarët.
“Mendoj se do të jetë një ndeshje interesante përballë një kundërshtari që e njohim mirë. Hollanda është rritur shumë. Kanë në përbërje futbollistë shume të talentuar. Duhet të përqendrohemi maksimalisht për këtë duel. Grupi jon i lojtarëve është më i mirë se një vit më parë. Jemi përmirësuar shumë nga ndeshja në ndeshje dhe presim vetëm rezultate pozitive. Trajneri Lev na ka ndihmuar shumë. Ai po e rikthen këtë skuadër aty ku e meriton pas dështimit në botëror. Jemi gati për sfidën me Holandën dhe do të japim maksimumin nga ky takim”.
Ndeshjen e radhës Gjermania do ta luaje ndaj Irlandës së Veriut ndërkoheë që Holanda do të udhëtojë në transfertën e Estonisë. /ABC News Albania 24/7
G. P.21:47 | 05/09/2019
Rënia e ndjeshme e kërkesës për produktet gjermane ka rritur frikën që ekonomia më e madhe e Europës të pësojë recesion në tremujorin e tretë të vitit. Përveç se nga rënia e kërkesës, tkurrja e ekonomisë gjermane i detyrohet edhe politikës proteksioniste të presidentit Donald Trump dhe daljes së planifikuar të Britanisë nga BE-ja.
Ekonomia më e madhe e Europës mund të hyjë në recesion në tremujorin e tretë të vitit, për shkak se dobësimi i kërkesave të jashtme për produktet gjermane ka çuar në një rënie të ndjeshme të prodhimit industrial.
Sipas agjencisë së lajmeve “Reuters”, ekonomia gjermane, e bazuar kryesisht tek eksportet, po vuan si pasojë e rritjes së ngadaltë globale dhe pasigurisë ekonomike, e shkaktuar nga politikat e presidentit amerikan Donald Trump dhe shtyrja e vazhdueshme e daljes së Britanisë nga BE-ja.
Sipas të dhënave të fundit të publikuara nga Ministria e Ekonomisë në Berlin, kërkesa për produktet gjermane ra me 2.7 për qind në periudhën Korrik-Gusht, e nxitur nga rënia e kërkesave nga vendet që janë jashtë zonës euro.
“Problemet në sektorin e manifakturës vazhdojnë dhe rënia e porosive të reja rrit ndjeshëm rrezikun e recesionit për ekonominë gjermane”, ka deklaruar analisti Thomas Gicel.
Edhe prodhimi i brendshëm gjerman u kontraktua me 0.1 për qind në tremujorin e dytë, pikërisht për shkak të dobësimit të eksporteve, shoqëruar me rënien e shitjeve jashtë vendit, edhe për shkak të rënies së kërkesave nga Britania dhe Kina.
“Rreziku është i madh që rritja negative të regjistrohet edhe në tremujorin e tretë”, shtoi Gicel.
Ministria e Ekonomisë deklaroi se porositë e reja për produktet gjermane kishin patur një fillim të dobët në tremujorin e tretë dhe parashikimet për sektorin industrial janë gjithashtu të zymta./ABC News Albania 24/7
ent ela10:40 | 02/09/2019
Ekstremistët e djathtë zgjerojnë edhe më shumë hartën e tyre në Gjermani. Partia populiste “Aleanca për Gjermaninë” ka pësuar një rritje të ndjeshme në dy landet Saksoni dhe Brandenburg, megjithëse u rendit forcë e dytë sipas rezultateve të zgjedhjeve të zhvilluara dje në këto dy lande.
Partia qeverisëse CDU vijon të ketë kryesimin në Saksoni, por me një rënie të theksuar votash. E po ashtu socialdemokratët u renditën të parët në landin e Brandenburgut. Por edhe pse te dy kryeministrat e këtyre landeve do të vazhdojnë të qeverisin, me gjasë koalicionet e tyre nuk do të mund të sigurojnë dot shumicën.
Që të dy politikanët kanë nevojë për koalicione trepartiake për të qeverisur. Por të dy kryeministrat e landeve e kanë përjashtuar kategorikisht një koalicion me Alancën për Gjermaninë. Partia populiste e djathtë, ndërkaq e ka komentuar me gëzim rritjen e saj në elektorat, duke i cilësuar zgjedhjet në dy lande si “sukses të madh”. Aleanca për Gjermaninë bën të ditur se tashmë edhe ajo do të jetë pjesë e vendimmarrjes politike. /ABC News Albania 24/7
08:47 | 14/10/2019
08:46 | 14/10/2019
08:39 | 14/10/2019
