Loading ...
Një zjarr i përmasave të mëdha shpërtheu në një ndërtesë banimi në Antverpë të Belgjikës, në mëngjesin e 1 korrikut.
Deri tani raportohet për gjashtë viktima, por bilanci mbetet paraprak, pasi ekipet e shpëtimit vazhdojnë të kontrollojnë ndërtesën në kërkim të personave të zhdukur ose viktimave të tjera. Ende nuk dihen shkaqet e zjarrit.
“Ndërtesa është evakuuar plotësisht”, deklaroi Marie De Clercq, zëdhënëse e shërbimit zjarrfikës të Antverpës. “Aktualisht ekipet tona janë të angazhuara në shuarjen e flakëve dhe në kërkimin e viktimave të mundshme. Bëhet fjalë për një operacion të përmasave të mëdha: në vendngjarje janë angazhuar më shumë se dhjetë mjete zjarrfikëse”, shtoi ajo.
Flakët shpërthyen në katin e tetë të një pallati dhjetëkatësh në lagjen Linkeroever, në pjesën lindore të Antverpës. Në këtë ndërtesë banojnë mbi 200 persona.
Sipas policisë, ndërhyrja e zjarrfikësve u zhvillua në kushte veçanërisht të vështira për shkak të përmasave dhe intensitetit të zjarrit. Në vendngjarje u angazhuan shumë ekipe zjarrfikësish, shërbime emergjence dhe forca policie, përfshirë edhe një njësi të specializuar të pajisur me dronë.
Zjarri shpërtheu rreth mesditës, ndërsa një fotograf i agjencisë AP në vendngjarje raportoi se tymi filloi të shpërndahej vetëm pas disa orësh. Autoritetet u kanë bërë thirrje banorëve të zonës të mbajnë të mbyllura dyert dhe dritaret dhe, nëse është e nevojshme, të fikin sistemet e ventilimit për shkak të përqendrimit të lartë të tymit në ajër.
