Zgjedhjet në Kosovë, diaspora mund të votojë përmes postës nga data 2 shkurt

Në kuadër të zgjedhjeve të parakohshme të 14 shkurtit, pritet që nesër të mbyllet regjistrimi dhe verifikimi i aplikacioneve të votuesve jashtë Kosovës.

Megjithëkëtë, Komisioni Qendror i Zgjedhjeve ende nuk ka një numër të saktë se sa aplikacione të diasporës janë të konfirmuara.

Zëdhënësi i KQZ-së, Valmir Elezi tha se nesër përmes një raporti të detajuar do të dihet saktë për votuesit me postë.

“Shërbimi votues është në përmbyllje e sipër të periudhës së regjistrimit dhe verifikimit të aplikacioneve për t’u regjistruar si votues jashtë Kosovës. Gjatë ditës së nesërme, e hënë, do të kemi një raport të detajuar se sa është numri i aplikacioneve të cilat janë pranuar deri më 21 janar, sa prej tyre janë aprovuar dhe sa janë refuzuar”, tha ai.

Elezi bëri të ditur se më datën 2 shkurt për aplikacionet e konfirmuara pritet të fillojë procesi i votimit me postë.

“Të gjithë qytetarët që arrijnë të regjistrohen suksesshëm si votues jashtë vendit, pasi kanë plotësuar kriteret ligjore, do të mund të votojnë përmes postës duke filluar nga data 2 shkurt. Fletëvotimet duhet të pranohen nga KQZ-ja deri më 12 shkurt. Po ashtu, nesër do të kemi edhe të dhëna nga qendra e thirrjeve lidhur me verifikimin e aplikuesve përmes telefonimit të tyre dhe se deri ku ka shkuar ky proces”, tha ai./abcnews.al