Gjest i bukur i Rahem Sterling në këtë periudhë festash. Një ditë më parë ishte Fernandinho, kapiteni i Manchester City, ai që surprizoi 9-vjeçarin Adam, një tifoz i thekur i “Cityzens”. Ky i fundit kishte kryer një operacion delikat në zemër dhe braziliani e surprizoi në një video konferencë.
Një pako me dhurata shkoi për vogëlushin, teksa klubi anglez i ka premtuar se do e bëjë maskotë në një ndeshje shtëpiake, në momentin që Adam do të shërohet plotësisht. Rikthehemi te Sterling. Sulmuesi anglez ka shkuar në një restorant për t’u ushqyer.
Afër derës qëndronin dy gra të pastreha duke lypur. Sterling është futur brenda dhe ka kërkuar që të përgatitej një vakt i shijshëm për dy gratë, sigurisht duke kërkuar leje që ato të futeshin brenda dhe të ushqeheshin shumë mirë. Bakshishi për punëtorët nuk ka munguar.
26-vjeçari ka kryer pagesën dhe është larguar. “Ai hyri në restorant në mënyrë kaq të natyrshme dhe u soll në mënyrë të përulur. Bëri pagesën, mori ushqimin e vet dhe u largua. Një zotëri i vërtetë“, deklaroi Wasib Arif, pronari i restorantit për The Sun. /abcnews.al
