Presidenti ukrainas Volodymyr Zelensky shënoi sot Ditën e Dinjitetit dhe Lirisë duke iu referuar sakrificave të bëra nga populli ukrainas pas pushtimit rus dhe duke thënë se vendi i tij do të durojë dhe do të fitojë.
Në një fjalim drejtuar kombit, Zelensky vlerësoi kontributet e ukrainasve – nga ushtarët, zjarrfikësit dhe mjekët ndihmës e deri te mësuesit që japin mësim online, fshatarët që po gatuajnë për ushtarët, rrobaqepësit që po qepin uniforma dhe fermerët që po kultivojnë arat e tyre pavarësisht rreziqeve.
Ai vlerësoi qëndrimin e tyre të guximshëm pavarësisht nga sulmet e shpeshta me raketa, shkatërrimet në shkallë të gjerë, mungesat dhe ndërprerjet e vazhdueshme të energjisë elektrike me fillimin e dimrit, nëntë muaj pas pushtimit rus.
“Mund të mbetemi pa para, pa gaz, pa ujë të ngrohtë, pa dritë. Por jo pa liri, “tha Zelensky.
Dita e Dinjitetit dhe Lirisë përkujton protestat pro-europiane të viteve 2013/2014, të njohura si Revolucioni i Sheshit Maidan dhe Revolucioni Portokalli i vitit 2004. Në të dyja rastet, lidershipi i vendit u rrëzua.
Duke theksuar guximin e ukrainasve, videoja e Zelensky përfshinte pjesë nga mesazhi që ai dha një vit më parë, kur ishte i veshur me kostum dhe kravatë.
Këtë vit, ai veshi uniformën e tij ushtarake.
“Çfarë ka ndryshuar që atëherë (një vit më parë)? Shumë. Toka jonë është e mbushur plot me mina. Në qytetet dhe fshatrat tona ka barrikada dhe barriera mbrojtëse antitank. Ndoshta është errësirë në rrugët tona. Ndoshta është ftohtë në shtëpitë tona”, tha Zelensky.
“Ka shumë ndryshime, por më e rëndësishmja nuk ka ndryshuar. Sepse gjëja më e rëndësishme nuk është jashtë por brenda. Dhe mbetet e pandryshuar. Dhe për këtë arsye ne do të rezistojmë. Do të durojmë”.
Ai tha se në të ardhmen ukrainasit do të mblidhen në Sheshin e Pavarësisë së Kievit, i cili ishte një pikë qendrore e ngjarjeve në vitet 2013/14 dhe 2004, “ku do të festojmë Ditën e Fitores së Ukrainës.
/abcnews.al
