Gjatë fjalimit, duke folur për vendin e tij, Zelensky tha se Ukraina do t’ia dalë të mundë të keqen, gjë që u prit me një tjetër raund duartrokitjesh.
“Kjo qëndron në thelbin e traditave tona, por edhe tuajat,” iu drejtua ai deputetëve në Westminster Hall.
“Rusia do të humbasë”, tha Zelensky.
Ai gjithashtu tha se Mbretëria e Bashkuar “po marshon drejt fitores më të rëndësishme të jetës sonë me ne”.
“Pasi të fitojmë së bashku, çdo agresor do ta dijë se çfarë e pret nëse sulmon rendin ndërkombëtar. Çdo agresor do të humbasë”, tha ai duke iu referuar Rusisë.
‘Kur filloi pushtimi në shkallë të plotë shkurtin e kaluar, Ukraina, së bashku me Mbretërinë e Bashkuar, SHBA dhe aleatët e tjerë “formuan një koalicion të vërtetë miqsh”.
“Ju ishit ndër ata shumë pak që na ndihmuan përpara se të fillonte pushtimi në shkallë të gjerë,” theksoi presidenti ukrainas.
Zelensky vlerësoi gjithashtu sanksionet e vendosura nga Mbretëria e Bashkuar kundër Rusisë, duke theksuar se duhet të vazhdojnë derisa Kremlini të mos mund të financojë më luftën e tij kundër Ukrainës krejtësisht.
“Ky do të jetë realiteti i ri i botës së lirë,” shtoi ai.
Ushtarët ukrainas po trajnohen në Britani për të operuar tanket Challenger , tha Zelensky, duke vënë në dukje premtimin e fundit të Mbretërisë së Bashkuar për të dhuruar 14 tanke luftarake.
“Unë falënderoj Rishi,” tha Zelensky drejtpërdrejt kryeministrit. “Për këtë hap të fuqishëm mbrojtës”.
“Bota me të vërtetë i ndihmon ata që janë të guximshëm në mbrojtjen e lirisë dhe po hap rrugën për një histori të re,” tha ai.
/abcnews.al
