Loading ...
Presidenti i Ukrainës, Volodymyr Zelensky, pritet që në Samitin e NATO-s në Ankara t’u bëjë thirrje aleatëve të përshpejtojnë dërgimin e sistemeve të mbrojtjes ajrore, të cilat Kievi i konsideron jetike për t’u përballur me intensifikimin e sulmeve ruse.
Kërkesa e Zelenskyt vjen pas sulmeve të fundit me raketa ndaj Kievit, ku brenda më pak se një jave janë goditur zona të banuara, duke shkaktuar dhjetëra viktima civile.
Në kuadër të samitit, presidenti ukrainas pritet të zhvillojë edhe një takim me presidentin amerikan Donald Trump. Zelensky synon të argumentojë se sulmet e fundit të Rusisë tregojnë se Moska po përpiqet të ushtrojë presion përmes përshkallëzimit të konfliktit dhe se presidenti rus Vladimir Putin duhet të detyrohet të angazhohet në negociata për një paqe të qëndrueshme dhe dinjitoze.
Ndërkohë, Ukraina ka shtuar sulmet me dronë me rreze të gjatë veprimi ndaj objektivave ushtarake dhe infrastrukturës energjetike në territorin rus. Sipas raportimeve, këto sulme kanë goditur rafineri nafte dhe kanë shkaktuar mungesa karburanti dhe ndërprerje të energjisë në disa zona.
Kryebashkiaku i Moskës, Sergei Sobyanin, deklaroi se sistemet ruse të mbrojtjes ajrore kanë rrëzuar shumicën e 430 dronëve të lëshuar nga Ukraina drejt kryeqytetit gjatë natës, ndërsa autoritetet nuk kanë bërë ende të ditur shkallën e dëmeve.
Në prag të Samitit të NATO-s, Zelensky shprehu shpresën se takimi do të sjellë vendime konkrete për mbështetjen e Ukrainës dhe nuk do të mbetet vetëm në nivel deklaratash.
Edhe Sekretari i Përgjithshëm i NATO-s, Mark Rutte, u bëri thirrje vendeve anëtare të shtojnë mbështetjen për Kievin, duke theksuar se Ukraina ka nevojë për mjetet e nevojshme për të mbrojtur sovranitetin e saj dhe për të vazhduar rezistencën ndaj agresionit rus.
