Presidenti i Serbisë, Aleksander Vuçiç ka përgëzuar Listën Serbe për fitimin e shumicës së votave të serbëve në zgjedhjet e përgjithshme në Kosovë. Vuçiç është shprehur se fitorja e Listës Serbe është e rëndësishme pasi, sipas tij, “po përballemi me një periudhë të vështirë”.
“Unë i përgëzoj njerëzit tanë. Kjo është një gjë e rëndësishme, sepse po përballemi me një periudhë të vështirë”, tha Vuçiç për televizionin serb, TV Pink.
Presidenti serb, komentoi po ashtu edhe faktin se Lista Serbe fitoi mbi 99% të votave në Mitrovicën e Veriut, duke ironizuar me kundërshtaren e tyre, Rada Trajkoviç.
“Si ndodhi që Rada Trajkoviç nuk mori asgjë? Duket se njerëzit e dinë kush po bën për njerëzit tanë atje dhe kush po mundohet vetëm për interes të tyre”, tha ai.
Nga 99.25% të votave të numëruara, Lista Serbe ka marrë 5,56%, ose 43, 746 vota. /abcnews.al/
