Në Tiranë po zhvillohet Samiti i radhës i “Open Ballkan” me pjesëmarrjen e Presidentit serb Vuçiç dhe kryeministrit të Maqedonisë së Veriut, Zaev. Pjesë e takimit, por online ishte edhe komisioneri për Zgjerimin, Olivér Várhelyi. Mes liderëve nuk munguan batutat.
“Më falni nëse mora shumë kohë nga koha juaj. E shoh që komisioneri është online. Oliver të përshëndesim nga Tirana” u shpreh Vuçiç.
Kryeministri Edi Rama ndërhyri duke shpjeguar me batutë përse nuk e prezantoi dhe i kërkoi “lajmin e ditës”.
“Oliver ndjesë që nuk të prezantova, por kur po flisja ekrani i BE-së ishte ende i ngrirë, tani jeni i shkrirë. Jam shumë mirënjohës që po merrni pjesë në këtë takim dhe pasi Zorani të bëjë komentet e tij do të lutesha që të ndërhyni.
Pra ju nuk ndiqeni vetëm nga ne, por nga shumë njerëz përmes ekranit dhe ata duan të dinë a e mbështet BE-ja Ballkanin e Hapur dhe nëse do ta thonit, kjo do të ishte lajmi i ditës. Oliver jeni miku më i mirë i të gjashtëve në Bruksel” tha Rama.
Marrëveshjet që u firmosën në Tiranë;
- Marrëveshja për kushtet për akses të lirë në tregun e punës në Ballkanin Perëndimor.
- Marrëveshja për ndërlidhjen e skemave të identifikimit elektronik të qytetarëve të Ballkanit Perëndimor.
- Marrëveshja ndërmjet Këshillit të Ministrave të Republikës së Shqipërisë dhe Qeverisë së Republikës së Serbisë dhe Qeverisë së Republikës së Maqedonisë së Veriut për bashkëpunim në fushën e veterinarisë, sigurisë ushqimore dhe ushqimore për kafshë dhe fitosanitare në Ballkanin Perëndimor.
- Marrëveshja ndërmjet Qeverisë së Republikës së Serbisë dhe Këshillit të Ministrave të Republikës së Shqipërisë për njohjen reciproke të autorizimeve të operatorit ekonomik të autorizuar – siguri dhe siguri (AEOS).
- Marrëveshja ndërmjet Qeverisë së Republikës së Maqedonisë së Veriut dhe Këshillit të Ministrave të Republikës së Shqipërisë për njohjen reciproke të autorizimeve të operatorit ekonomik të autorizuar – siguri dhe siguri (AEOS).
/ Abcnews.al
