Loading ...
Një ngjarje e rëndë kriminale është zbardhur nga Policia e Lezhës në fshatin Fushë Mamurras, Kurbin, ku një 85-vjeçare dyshohet se është vrarë nga vajza e saj 57-vjeçare Violeta Shpani.
Sipas hetimeve, 85 vjeçarja Dave Shpani ka humbur jetën më 30.04.2026 si pasojë e goditjeve me thikë, ndërsa fillimisht rasti është raportuar si vdekje natyrale dhe nuk është njoftuar Policia.
Nga veprimet hetimore rezulton se autore e dyshuar e ngjarjes është vajza e viktimës, shtetasja Violeta Shpani, 57 vjeçe, e cila jetonte në të njëjtën banesë me të ndjerën dhe dyshohet se vuan nga probleme të shëndetit mendor.
Në vijim të hetimeve, Policia e Lezhës ka ndaluar 57-vjeçaren, e dyshuar për veprën penale “Vrasje për shkak të marrëdhënieve familjare”.
Si provë materiale është sekuestruar edhe thika, së bashku me prova të tjera që lidhen me ngjarjen.
Gjithashtu, materialet procedurale janë referuar në gjendje të lirë edhe për shtetasen Anila Lleshi me detyrë mjeke, për veprën penale “Shpërdorim detyre”, pasi dyshohet se ka plotësuar aktin e vdekjes duke e cilësuar si vdekje natyrale dhe pa njoftuar organet e rendit.
Nën drejtimin e Prokurorisë vijojnë hetimet për dokumentimin e plotë të ngjarjes./abcnews.al
