Loading ...
Një krim i rëndë ka tronditur Meksikën, ku katër persona të së njëjtës familje dhe rrethit të saj janë gjetur të vrarë brenda një apartamenti në Atizapán, në periferi të Qytetit të Meksikos.
Mes viktimave është edhe Jonathan Melendez, muzikant dhe një prej themeluesve të grupit Camilo Séptimo. Bashkë me të u vranë bashkëshortja e tij shtatzënë, vajza e tyre 3-vjeçare dhe një grua që punonte si ndihmëse shtëpie për familjen.
Trupat u gjetën brenda apartamentit në kompleksin rezidencial Grand Viure, në zonën Bosque Esmeralda. Sipas hetuesve, Melendez dhe bashkëshortja e tij dyshohet se ishin lidhur përpara se të qëlloheshin, ndërsa gruaja që punonte në banesë u gjet me një plagë arme zjarri në shpinë.
Në vendngjarje policia gjeti të gjallë djalin 6-vjeçar të çiftiT, I cili nuk kishte shenja të dukshme dhune apo dëmtime fizike.
Brenda banesës u gjet edhe qeni i familjes, i ngordhur dhe i lidhur. Autoritetet po hetojnë nëse krimi lidhet me një grabitje që mund të ketë përfunduar në vrasjen e katër personave.
Dy persona janë arrestuar në lidhje me ngjarjen, ndërsa prokuroria po punon për të përcaktuar motivin dhe për të rindërtuar dinamikën e krimit.
Sipas të dhënave paraprake, vrasjet dyshohet se janë kryer mes orës 17:30 dhe 19:40, ndërsa policia është njoftuar disa orë më vonë dhe ka mbërritur në apartament rreth orës 23:50.
