Ministri i Shëndetësisë, Arben Vitia në seancën e sotme të Kuvendit ka thënë se të gjitha vaksinat që ka Kosova në dispozicion janë të sigurta.
Vitia ka theksuar se Kosova është i vetmi vend në rajon i cili ka në stoqet e veta vetëm vaksina të aprovuara nga Agjencia Evropiane e Barnave.
Ministri ka kritikuar disa deputetë për siç ka thënë ai që po e abuzojnë pozitën dhe po ndikojnë që qytetarët të hezitojnë për vaksinim.
“Është e pandershme dhe është abuzim me pozitën që kanë disa nga kolegët tanë me qëndrimet karshi vaksinimit dhe vaksinave. Kosova është i vetmi vend në rajon i cili ekskluzivisht ka në stoqet e veta vaksina të aprovuara nga EMA. Të gjitha vaksinat janë të sigurta. Tani që variant Delta është i pranishëm edhe në Kosovë dhe rreziku i shfaqjes së një vale të re është i mundshëm, ishte dashur që në këtë qasje të kemi një qëndrim të përbashkët dhe të jemi të bashkuar që në mënyrë sa më efikase të vaksinohen të gjithë qytetarët. Çdo thirrje tjetër është e pandershme, çdo hezitim që po mundohen ta bëjnë është i pandershëm”, ka shtuar ai.
Vitia ka thënë se asnjë nga personat e vaksinuar deri tani kundër COVID-19 nuk ka pasur ndonjë efekt serioz nga vaksina.