Pas 3 ditësh, situata në Peshtan të Fierit ka filluar të përmirësohet ku flakët janë vënë nën kontroll.
Gazetari i ABC News, Leonidha Musaj raporton se një pjesë e flakëve është shuar nga helikopteri i Ministrisë së Mbrojtjes.
Ndërkaq, ministri i Brendshëm, Taulant Balla inspektoi nga afër situatën, i shoqëruar nga kryebashkiaku dhe prefekti i qarkut të Fierit.
“Kemi një lajm të mirë. Situata është vënë nën kontroll këtu në zonën e Peshtanit në Fier, ku një zonë pyjore është përfshirë nga flakët prej 3 ditësh. Reparti zjarrëfikës vazhdon të jetë në punë me forca të shtuara, 7 automjete të repartit zjarrfikës të Fierit dhe të Mallakastrës janë në vendin e ngjarjes duke u përpjekur për të vënë në kontroll flakët, por punën më të madhe e ka bërë helikopteri, duke bërë të mundur shuarjen e flakëve në brendësi të pyllit, aty ku ishte e pamundur për të ndërhyrje automjetet e repartit zjarrfikës. Pak minuta më parë, ishte edhe ministri i Brendshëm, Taulant Balla, i cili inspektoi nga afër situatën, ku shoqërohej nga kryetari i bashkisë, por edhe prefekti i qarkut të Fierit”, raportoi gazetari Musaj./abcnews.al
