Mëngjesin e sotëm rreth orës 07:05 një zjarr ra në Spitalin Rajonal të Shkodrës. Policia njoftoi se zjarri ra në katin e katërt të spitalit, në njërën prej dhomave të pacientëve në Shërbimin e Pneumologjisë.
Si pasojë një dhomë e repartit siç duket edhe në pamje është shkrumbuar totalisht.
Në njoftim thuhej paraprakisht se shkaku i rënies së zjarrit ka qenë aksidental, ndërsa gazetari i ABC News, Simon Shkreli raporton se shkak ka qenë një bombul gazi.
LEXO EDHE: Zjarr në Spitalin Rajonal të Shkodrës, çfarë dyshohet
Së fundmi me anë të një reagimi, Spitali Rajonal i Shkodrës thotë se nuk ka pacientë të lënduar dhe se po merren masa për riparimin e ambientit.
Reagimi:
Spitali Rajonal Shkodër: Nuk ka pacientë të lënduar, po merren masa të menjëherëshme për riparimin e ambientit. Spitali Rajonal Shkodër bën me dije se në orën 6:45 të mëngjesit të sotëm, ka ndodhur një incident, ku ka rënë zjarr në njërën prej dhomave të pacientëve në Shërbimin e Pneumologjisë.
Pacientët janë evakuuar në kohë dhe nuk ka patur të lënduar.
Zjarri është shuar menjëherë, duke mos lejuar përhapjen në dhomat e tjera.
Spitali Rajonal i Shkodrës siguron se shërbimi vijon pa ndërpreje teksa po merren masa të menjëherëshme për riparimin e ambientit ku ka ndodhur incidenti.
View this post on Instagram
Njoftimi i policisë:
Shkodër/Informacion paraprak.
Rreth orës 07:05, të mëngjesit të sotëm, në katin e katërt të Spitalit Rajonal Shkodër, në një nga dhomat e Repartit të Kirurgjisë, ka rënë zjarr.
Shërbimet e Policisë dhe zjarrfikësit shkuan menjëherë në vendngjarje.
Ndërhyrja në kohë e shërbimeve bëri të mundur neutralizimin e flakëve, duke mos lejuar përhapjen e flakëve në dhomat e tjera si dhe shuarjen e plotë të zjarrit.
Nga zjarri nuk ka persona të lënduar, vetëm dëme materiale.
Grupi hetimor vijon punën për zbardhjen e shkakut të rënies së zjarrit, paraprakisht dyshohet aksidental.r.t/abcnews.al
