Bota është në zi sot pas humbjes së legjendës të futbollit, Diego Armando Maradona. Paraditen e sotme janë zhvilluar dhe homazhet dhe trupi i ish-sulmuesit të Napolit është vendosur në Casa Rosada në Buenos Aires, e cila është shtëpia dhe vendi ku punon Presidenti i Argjentinës.
Kanë qenë me mijëra tifozë të “Dorës së Zotit”, të cilët kanë shkuar për t’i dhënë lamtumirën e fundit një prej futbollistëve më të mirë të të gjithë kohërave. Ka radhë të gjata para hyrjes në presidencë për orë të tëra, ku nuk kanë munguar as tensionet e disa personave me policinë.
Madje zënkat shkuan deri në atë pikë sa policia u detyrua të arrestonte disa nga “të padururarit”. Arkivoli i Diegos është mbuluar me flamurin e kombëtares argjentinase, atë që ai e ka mbajtur për vite më radhë në shpinë, fanëllen me numrin 10. /abcnews.al
