VIDEO/ Izraeli rrëzon dronët e Libanit që po shkonin drejt platformës së gazit

schedule08:26 - 3 Korrik, 2022

schedule 08:26 - 3 Korrik, 2022

Autoritetet në Izrael thonë se kanë rrëzuar tre drone të Hezbollahut që po shkonin drejt një prej platformave të tij të gazit në një zonë të diskutueshme të Mesdheut.

Zyrtarët ushtarakë thonë se dronët u nisën nga Libani dhe u rrëzuan nga një kombinim i avionëve luftarakë dhe raketave të montuara në anije.

Hezbollah konfirmoi se kishte lëshuar dronët në një deklaratë të shkurtër.

Tensionet janë rritur midis Izraelit dhe Libanit mbi pronësinë e fushës së gazit Karish.

I dërguari i SHBA për energjinë, Amos Hochstein po ndërmjetëson midis dy vendeve për të zgjidhur mosmarrëveshjen e gjatë.

Izraeli thotë se fusha shtrihet brenda zonës së tij ekskluzive ekonomike të njohur nga OKB, por edhe Libani ka pretenduar për disa pjesë të saj.

Hezbollah tha se kishte shënjestruar platformën si pjesë e një fluturimi zbulimi.

“Misioni u krye dhe mesazhi u mor”, thuhet në deklaratë.

Javën e kaluar, lideri i grupit, Hassan Nasrallah, kërcënoi se do të përdorte forcën për të parandaluar Izraelin të operonte platformën.

Ministri izraelit i Mbrojtjes Benny Gantz tha se grupi islamik “po pengonte shtetin e Libanit të arrijë një marrëveshje në lidhje me kufijtë detarë, të cilët janë kritikë për ekonominë dhe prosperitetin e kombit libanez”.

Sulmi i raportuar i Hezbollahut vjen në mes të paqëndrueshmërisë politike në Izrael.

Të enjten ligjvënësit votuan për shpërndarjen e parlamentit dhe shpalljen e zgjedhjeve të pesta në katër vjet.

Votimi, i cili vjen pas rënies së koalicionit shumëpartiak të ish-kryeministrit Naftali Bennett, i ofron Benjamin Netanyahu, liderit të opozitës së krahut të djathtë, një shans për t’u rikthyer në pushtet./Abcnews.al/