Një zjarr në orët e para të mëngjesit të sotëm i mori jetën një foshnje 6-muajshe në Tiranë.
Ngjarja ka ndodhur në rrugën “Gani Domi”, teksa vogëlushi ndodhej në shtëpi vetëm me gjyshen Janulla.
Kjo e fundit jetonte me vajzën e divorcuar dhe nipin 6-muajsh. Gazetarja e Abc, Xhensila Kodra mëson se kryefamiljari kishte ndërruar jetë disa vite më parë.
Abc ka siguruar pamjet nga shtëpia e djegur. Mësohet se gjyshja ndodhej në bodrum duke gatuar kur kanë shpërthyer flakët. Ajo ka dalë për të kërkuar ndihmë dhe kanë qenë fqinjët ata që kanë sinjalizuar policinë dhe i kanë dhënë ndihmën e parë.
Lexo edhe: E rëndë në Tiranë, përfshihet nga zjarri shtëpia te Materniteti i Ri, vdes foshnja 6 muajshe
Dritaret e shtëpisë kanë qenë me kangjella dhe për këtë shkak ka qenë e vështirë ndërhyrja e zjarrfikësve të cilët kanë çarë murin për të hyrë brenda.
Foshnja është nxjerrë me shenja jete mëson Abc, por ka humbur jetën në spital.
Sipas fqinjëve nëna e vogëlushit nuk ndodhej në shtëpi në momentin e tragjedisë.
Dyshohet se shkak i ngjarjes ka qenë një bombol gazi. /Abcnews.al/
