Tema e themelimit të Ushtrisë së Kosovës ka provokuar reagime që nga Lindja e deri në Perëndim. Analistët në Beograd thonë se ky është një vit i rrezikshëm.
Hapja e temës së ushtrisë së Kosovës ka kthyer sërish debatin tek përcaktimi Lindje apo Perëndim.
Rusia ka reaguar ashpër ndaj deklarimeve të Uashingtonit pro ushtrisë. Në këtë linjë Serbia është parë si rrezik dhe SHBA-të janë rikthyer në Ballkan.
Analisti politiko ushtarak, Aleksandër Radiç, thotë se është normale mbështetja për ushtrinë e Kosovës pasi shtetet perëndimore duan largimin e KFOR-it dhe një marrëdhënie sado normale mes Prishtinës dhe Beogradit. Gabimi është bërë nga Perëndimi që nuk u mor seriozisht me Ballkanin për një dekadë.
“Nga të gjithë ne është pritur të zgjidhim probleme të mëdha siç janë marrëdhëniet Beograd-Prishtinë, duke marrë parasysh edhe problemet e mëdha ekonomike, institucione jo të qëndrueshme dhe nuk është bërë shumë për tu dhënë kurajo këtyre vendeve deri më tani”, shprehet analisti politiko-ushtarak, Aleksandër Radiç.
Ata që janë kundër ideve të SHBA thonë se zgjidhja e kompromisit nuk duket. Ballkani thonë ata është linjë fronti. Paqja do arrihej nëse Kosova kthehet në Serbi dhe shqiptarët qëndrojnë si partner.
“Situata nuk ka ndryshuar shumë dhe ky vit është i rrezikshëm pasi Perëndimi bën presion ndaj Rusisë dhe do ta vazhdoj atë dhe pres tensionim të situatës në përgjithësi. Shpresoj që kjo do ta anashkaloj Ballkanin, por kam dyshime deri tek konfliktet e armatosura”. Stevan Gajiç nga Instituti për Studime Evropiane
Serbia megjithatë ka kërkuar paqe dhe kompromisin e ka politikë zyrtare. Afërsinë me Rusinë shume shtete e kanë parë si pengesë./abcnews.al
