Lulzim Basha i është bashkuar mbrëmjen e të martës protestuesve tek Unaza e re, pasi sic deklaroi ka pasur një përpjekje të policisë për të ndërhyrë me forcë ndaj tyre.
Protesta e së martës ka tejkaluar orarin e zakonshëm, e bllokimi i rrugës ka zgjatur tre orë, ç’ka ka shkaktuar pakënaqësi të drejtuesve të mjeteve. Policia devijoi trafikun, duke zhvendosur edhe trafikndarëset dhe u largua pas mbërritjes së Bashës, rreth orës 21:00.
“Mbi katër muaj që protestojnë natë për natë për pronat e tyre nga afera më korruptive për të cilën sot duhet të ishte në burg Damian Gjiknuri dhe duhet të ishte marrë i pandehur Edi Rama. Ky është informacioni që ka rrjedhur në mënyrë të besueshme që një urdhër politik i ardhur në nivele më të larta, supozohet Sandër Lleshaj apo dhe nga Edi Rama për të kryer akte reprezalje mbi banorët.
Interpretimi im është që bisha e tërbuar bëhet më e rrezikshme në momentet e fundit dhe në vend që ti venë gisht kokës ushtrojnë terror mbi banorët. Mbi ç’bazë hodhën gaz mbi protestuesit ditën e shtunë? Me të njëjtët argumente se kanë dalë nga bandat dhe u shërbejnë bandave”, tha Basha./abcnews.al
