Është ulur intensiteti i flakëve në Parkun Kombëtar të Prespës, ku rreth 5-6 km janë vënë nën kontroll, në vijë lineare Lidhur me situatën aktuale në këtë zonë ka folur prefekti i qarkut të Korçës, Nertil Jole dhe kryebashkiaku i Pustecit, Pali Kolevski.
Jole ka thënë se janë duke luftuar me flakët e zjarrit për të shtatën ditë në Parkun Kombëtar të Prespës, një vatër komplekse, për të neutralizuar ku është mundësia e mospërhapjen së mëtejshme të vatrës së zjarrit duke shpresuar që në këtë mënyrë do të kufizojnë ecurinë e saj.
“Jemi sot këtu në Goricë së bashku me kryetarin e bashkisë Pustec për të bërë përpjekjen e radhës, në ditën e 7-të, për të luftuar një vatër komplekse, në zonën e Parkut Kombëtar të Prespës.
Kemi organizuar punën me të gjitha strukturat operacionale në nivel qarku na janë ofruar si mbështetje edhe shërbimet e bashkive të tjera së bashku me detashmentin, agjensinë e zonave të mbrojtura, me shërbimin pyjor, strukturat e policisë etj.
Jemi organizuar punën në mënyrë që të bëjmë përpjekjen e radhës, për të neutralizuar ku është mundësia e mospërhapjen së mëtejshme të vatrës së zjarrit duke shpresuar që në këtë mënyrë do të kufizojmë ecurinë e saj.
Në çdo rast jemi në komunikim të vazhdueshëm edhe me autoritete, ministrinë e Mbrojtjes, me ministrin posaçërisht, me Drejtorinë e Agjensisë Kombëtare të Mbrojtjes Civile duke shpresuar që nuk do të jetë e nevojshme të angazhohet mekanizmi europian për ndërhyrje nga ajri megjithatë nëse një nevojë e tillë do të jetë kemi marrë mbështetje dhe garanci që të sigurohet edhe ky shërbim në mënyrë që të mbrojmë një nga zonat më të pasura pyjore të qarku tonë por edhe të gjithë Shqipërisë”, u shpreh ai.
Ndërsa, Kolevski ka theksuar se sot do jetë dita më vendimtare siç parashikojnë edhe specialistët e zonave të mbrojtura dhe zjarrfikses.
“Sot janë rreth 80 forca të cilat presin të shkojnë te vatrat e zjarrit. Sot do jetë dita më vendimtare siç parashikojnë edhe specialistët e zonave të mbrojtura dhe zjarrfikses.
Këtu jemi mbledhur si qark, nga të gjitha bashkitë e qarkut, nga FA, nga zonat e mbrojtura dhe vullnetarë nga fshati Goricë e Madhe.
Në këto momente është ulur intensiteti i flakëve si rezultat i punës intensive të punonjësve që kanë punuar edhe gjatë mbrëmjes. Sipas informacioneve të para mësohet se rreth 5-6 km janë vënë nën kontroll, vijë lineare. Siç tha edhe prefekti ne kemi komunikuar edhe me emergjencën civile të Shqipërisë edhe me palën maqedonase edhe me partnerë të tjerë të cilët kanë shprehur gadishmërinë, të shpresojmë mos jetë e nevojshme dhe ta vemë nën kontroll përfundimisht”, tha Kolevski./abcnews.al
